Presidenti Ilir Meta ka falenderuar Norvegjinë për bashkëpunimin mes dy vendeve me rastin e 50 vjetorit të vendosjes së marrëdhënieve diplomatike mes tyre.
“Kënaqësi e veçantë, që në bashkëpunim me Ambasadën e Mbretërisë së Norvegjisë të organizonim sot në mbrëmje një ceremoni festive në nderim të 50-vjetorit të vendosjes së marrëdhënieve diplomatike mes dy vendeve tona dhe Festës Kombëtare të Norvegjisë, të njohur si Dita e Kushtetutës.
Në këtë përvjetor të rëndësishëm, duhet të jemi krenarë, që bashkëpunimi ndërmjet vendeve tona është zgjeruar dhe thelluar ndër vite dhe është bërë gjithmonë e më shumë përmbajtësor.
Është në interesin më të mirë të të dy popujve tanë, që këto marrëdhënie të përparojnë edhe më tej.
Angazhimi strategjik i Mbretërisë së Norvegjisë në rajonin tonë dhe ndjenjat e ndërsjella miqësore janë trualli mbi të cilin janë hedhur themelet e një marrëdhënie gjithmonë e më të qëndrueshme mirëbesimi dhe partneriteti.
Mirënjohje Qeverisë norvegjeze për angazhimin mbresëlënës në të gjitha programet zhvillimore dhe ndihmuese për Shqipërinë ndër vite.”
