Ilir Meta firmos urdhrin nga qelia: Të analizohet rezultati për çdo qendër votimi në Tiranë!

Ilir Meta arriti të merrte vetëm 7 981 vota preferenciale në zgjedhjet e 11 Majit, duke përfshirë edhe ato të diasporës, një rezultat zhgënjyes që e la pa mandat, por edhe për faktin se PD i dha forcës së tij politike dy deputetë në listën e sigurt të Tiranës.

Nisur nga kjo situatë, Ilir Meta ka firmosur një shkresë nga qelia e burgut, ku urdhëron Partinë e Lirisë që të analizojnë rezultatin e zgjedhjeve të 11 Majit për çdo Njësi dhe Qendër Votimi në Qarkun Tiranë për të verifikuar punën dhe rolin e gjithsecilit.

Anëtarët e Kryesisë kanë afat deri më 23 Maj që të dorëzojnë një raport me shkrim mbi aktivitetin elektoral në terren, teksa raportet do të analizohen në mbledhjen e Kryesisë më 1 Qershor.

Më konkretisht Meta kërkon:

“1. Secili anëtar i Kryesisë të paraqesë brenda datës 23 Maj 2025, një raport me shkrim mbi aktivitetin elektoral në terren të zhvilluar në funksion të zgjedhjeve të 11 Majit, qendrat e votimit ku ka punuar dhe rezultatin e tyre, votat personale që ka raportuar dhe reflektimin e tyre në rezultatin përfundimtar.

2. Raport mbi angazhimin personal ditën e votimit më 11 Maj, në Njësinë dne qendrën e tij të votimit, si dhe në ditët pasuese të numërimit të votave në Njësinë dhe QV e marra përsipër.

3. Raport i posaçëm nga Sekretari për Diasporën mbi aktivitetin e Komisionit të ngritur për verifikimin e votuesve jashtë vendit, votat e identifikuara dhe analizën e rezultatit të votave në diasporë për Qarkun Tiranë.

4. Këto të dhëna të paraqiten te Sekretari i Përgjithshëm, Z. Tedi Blushi, i cili së bashku me Kryetarin e Komitetit Drejtues Kombëtar, Z. Edmond Haxhinasto dhe anëtarin e Sekretariatit për Organizimin, Z. Rexhep Ballmi kanë për detyrë të bëjnë vlerësimin paraprak në bashkëpunim me drejtuesit ose të ngarkuarit e njësive për Qarkun e Tiranës.

5. Më datë 1 Qershor 2025, raportet të analizohen në mbledhjen e Kryesisë.”

Lajmin e ka bërë me dije vetë Ilir Meta përmes një postimi në rrjetet sociale, ku ka publikuar shkresën, teksa krahas saj shkruan:

“Të dashur anëtarë dhe simpatizantë të Partisë së Lirisë,

Firmosa sot urdhrin për analizimin e rezultatit të zgjedhjeve të 11 Majit për çdo Njësi dhe Qendër Votimi në Qarkun Tiranë për të verifikuar punën dhe rolin e gjithsecilit.

Edhe njëherë faleminderit me mirënjohje të gjithë atyre të cilët i rezistuan presioneve të jashtëzakonshme të Narkoshtetit dhe nuk e shitën as lirinë, as shpirtin dhe as karakterin e tyre përballë një makinerie kriminale shtetërore, që cënoi rëndë standardet e zgjedhjeve, demokracinë dhe shtetin e së drejtës, duke vijuar me vendosmëri, qëndresë e kurajë t’i prijnë betejës tonë të përbashkët në mbrojtje të kauzave madhore.”