Inceneratorët/ A u shkelën procedurat? Ja si përgjigjet drejtoresha e APP

Pas kryebashkiakut të Elbasanit është thirrur si dëshmitare sot në Komisionin Hetimor,  Drejtoresha e Agjencisë së Prokurimit Publik, Redia Kashta. Në shumë pyetje Kashta është zënë ngushtë dhe nuk ka ditur të jap një përgjigje konkrete dhe me fakte. E njëjta gjë ndodhi edhe kur u nga kryetarja e komisionit Jorida Tabaku, nëse ishin shkelur procedurat për hapjen e një tenderi publik për inceneratorin e Tiranës.

Sipas Tabakut, njoftimi është bërë në gazetën The Economist, por ka qëndruar për vetëm 36 ditë, dhe jo 52 siç e parashikon procedura për tender ndërkombëtar.

Kashta tha se “është çështje fakti” dhe mbetet për t’u verifikuar kohëzgjatja e shpalljes si në gazetën e huaj dhe në sistemin online të prokurimit. Por, Tabaku këtë e konsideroi një justifikim që tregon hapur se institucionet tona nuk veprojnë.

Pjesë nga diskutimet

Tabaku: Jam e çuditur si ju, një punonjëse e vjetër e Agjencisë së Prokurimit, nuk e keni bërë një monitorim. Për këtë do të pyesim edhe sekretarin e kryeministrit kur të vijë këtu.

Tabaku: Për inceneratorin e Tiranës, shpallja e procedurës duhet të ishte e hapur ndërkombëtare. Kemi një pagesë në gazetën Economist, që ka mbetur e hapur për 36 ditë, a mund të quhet ndërkombëtare?

Redia Kashta: Nëse i referoheni Tiranës, është bërë në sistemin e prokurimit, dhe duhet parë nëse në sistemin e prokurimit elektronik, nëse është mbajtur 52 ditë apo 36 ditë. Është çështje afatesh, janë respektuar apo jo.

Tabaku: Një procedurë e hapur ndërkombëtare që duhet të jetë 52 ditë është mbajtur 36 ditë, a konsiderohet kjo një shkelje ligji?

Redia Kashta: Është çështjet fakti, për të parë se sa ditë është mbajtur e hapur në gazetë dhe prokurimin elektronik.

Tabaku: Nuk e keni ju përgjegjësinë për atë që ka Agaçi apo Koka, është shkelur kriteri i tenderit ndërkombëtar, nuk jepni dot përgjigje a është shkelur apo jo procedura. Keni patur komunikime me Engjëll Agaçin? Keni dijeni për vendimet e qeverisë që miratohen?

Redia Kashta: Që publikohen në përgjithësi? Jo. Ndjekim ato VKM që na përcillen zyrtarisht.