Skandali për inceneratorët është zhvendosur nga Komisioni Hetimor në Komisionin Parlamentar për Stabilizim Asociimin me BE. Përfaqësuesi i Delegacionit të Parlamentit Europian, Eurodeputeti irlandez, Ciaran Cuffe në fjalën e tij mbi çështjet e mjedisit dhe potencialin e tranzicionit në ekonomi të gjelbërt theksoi qëndrimin e BE-së se Incenerimi duhet të mbetet zgjidhja e fundit në menaxhimin e qëndrueshëm të mbetjeve në vendet e Bashkimit Europian.
Sipas tij, duke iu referuar edhe dhe acquis të BE, tranzicioni për ekonomi të gjelbërt prioritizon një qasje ndaj riciklimit dhe ripërdorimit.
Ndërkaq, nënkryetarja e PD-se, Jorida Tabaku u shpreh se incenerimi është aferë korruptive e zhvilluar pa garë, ndërsa shtoi se është në kundërshtim me rregullat e BE.
“Në këtë kontekst, politika e qeverisë bazuar tek inceneratorët, nisur nga përvoja e deritanishme ka pasur mungesë të transparencës dhe llogaridhënies. Kjo ka çuar në shndërrimin e një afere të vërtetë korruptive, e cila kërkon zbardhje nga ana e drejtësisë para opinionit publik por dhe vetë partnerëve tanë europianë. Incenerarorët nuk kanë zgjidhur në mënyrë të qëndrueshme problemin e menaxhimit të mbetjeve. Qartësisht kjo politikë nuk ka adresuar dhe prioritizuar rekomandimet e vazhdueshme nga Komisioni Europian mbi nevojën e një strategjie të qëndrueshme që garanton ndarjen e mbetjeve në burim, reduktimin e varësisë së landfilleve, riciklimin dhe ripërdorimin ku mundet”, tha Tabaku.
Discussion about this post