Një ish-deputet, tashmë biznesmen, ka tentuar të marrë rreth 180 mijë euro nga kompania koncesionare e inceneratorit jo-funksional të Fierit për punime të pretenduara ndërtimore dhe të shoqëruara me fatura pa vulë.
Bujar Derveni ka qenë deputet i ish-Lëvizjes Socialiste për Integrim (LSI) në periudhën 2013-2017. Para se merrte mandatin, ai ka qenë aksioner dhe administrator në shoqërinë e ndërtimit “Eurogrup Themele Speciale”. Derveni u shkëput nga administrimi i shoqërisë përsa kohë që ishte në Parlament dhe u rikthye në aktivitetin tregtar pas përfundimit të mandatit.
Aktualisht, Bujar Derveni është aksioneri i vetëm i “Eurogrup Themele Speciale”. Në mars të vitit 2025, shoqëria e Dervenit dorëzoi një kërkesë në Gjykatën e Tiranës, në të cilën kërkohej lëshimi i urdhër-ekzekutimit për 7 fatura që nuk i ishin paguar prej disa vitesh nga ana e kompanisë “Integrated Technology Waste Treatment, Fier”.
Ish-deputeti: Dua 180 mijë euro
Këto fatura i përkisnin periudhës 2018-2019 dhe, në total, mbërrinin në një vlerë saktësisht 179.888 euro.
Në kërkesë, kompania e Bujar Dervenit deklaronte se mes “Eurogrup Themele Speciale” dhe “Integrated Technology Waste Treatment Fier” ishte nënshkruar një kontratë bashkëpunimi në vitin 2018.
Në bazë të asaj kontrate, “Eurogrup Themele Speciale” merrte përsipër kryerjen e disa punime ndërtimore për llogari të kompanisë koncesionare të landfillit dhe inceneratorit të Fierit.
Kontrata ishte me afat një-vjeçar dhe çmimi i vendosur mes palëve ishte 250 mijë euro, të cilat do të paguheshin nga “Integrated Technology Waste Treatment Fier” me këste mujore.
Në lidhje me këto fatura, kërkuesi pretendon se nuk është paguar nga ana e shoqërisë “Integrated Technology Waste Treatment Fier” sh.p.k në vlerën totale të detyrimit prej 179.880 euro dhe, në këto kushte i është drejtuar Gjykatës për të kërkuar lëshimin e urdhrit tëekzekutimit për këto fatura tatimore shitje në mënyrë qëtëfillojëekzekutimin e detyrueshëmpër vjeljen e detyrimit.
Gjykata e Tiranës e ka refuzuar kërkesën e kompanisë së Bujar Dervenit, pasi ka konstatuar se provat e paraqitura në gjykatë nuk ishin të rregullta.
“Boldnews.al” ka siguruar vendimin e gjyqtares së Tiranës, Matilda Llangozi, miratuar në 4 Korrik 2025.
Refuzimi i gjykatës
Në vendimin e refuzimit, gjyqtarja argumenton se, në të shtata faturat e pretenduara nga shoqëria e Dervenit, në asnjërën prej tyre nuk gjendeshin vulat, as të shitësit “Eurogrup Themele Speciale” dhe as të blerësit “Integrated Technology Waste Treatment Fier”.
“Faturë Tatimore Shitje Nr 93, Nr serial 49491289 datë 31.08.2018, në vlerën 43,624.8 Euro. Në përshkrimin e mallrave ose shërbimit është shënuar ‘Sipas Situacionit Nr 1 bashkangjitur’. Kjo faturë është nënshkruar nga Shitësi Muharrem Maja ndërsa nërubrikën blerësi ka nënshkruar DariJero. Rezulton se nuk janë vendosur vulatesubjektit blerës“Integrated Thechnology Waste Treatment Fier”sh.p.k si dhe vula e subjektit shitës. Edhe ne situacionin nr 1 që i është bashkangjitur kësaj fature rezulton se nuk janë vendosur vulat e personave juridike, pra të shoqërive përkatëse, por vetëm janë nënshkruar”.
Ky është përshkrimi që ka dhënë gjyqtarja në vendimin e saj për një nga shtatë faturat. Ndërkohë që edhe për 6 faturat e tjera ka rezultuar e njëjta situatë, ku në to gjenden firmat e atyre që duket se janë shitësi e blerësi, por dokumentacioni nuk është konfirmuar me vulën e shoqërive përkatëse.
Pasi ka konstatuar këtë anomali thelbësore, gjykata e Tiranës ka vendosur të rrëzojë kërkesën e shoqërisë “Eurogrup Themele Speciale” të Bujar Dervenit për likujdimin e borxhit të pretenduar në shumën 180 mijë euro.
Kompania “Integrated Technology Waste Treatment Fier” u krijua në vitin 2016, në kuadër të kontratës koncesionare që nënshkroi me qeverinë shqiptare për ndërtimin dhe operimin e landfillit dhe inceneratorit të përpunimit të mbetjeve, në qytetin e Fierit.
Aksionerët e saj janë “Integrated Technology Service” në pronësi të Klodian Zotos dhe “Furst Kollos”, me aksionerë anëtarët e familjes Kollozi nga Fieri.
Prej marsit të vitit 2022, kompania administrohet nga Agjencia shtetërore e Pasurive të Sekuestruara dhe Konfiskuara, pas vendimit të Gjykatës së Posaçme, në vijim të një hetimi të nisur nga Prokuroria Speciale (SPAK), në kuadër të asaj që konsiderohet si “afera e inceneratorëve”.
Pas vendosjes nën sekuestro nga Gjykata, mbi “Integrated Technology Waste Treatment Fier” janë në fuqi edhe disa urdhëra të zyrave përmbarimore, për detyrime të pashlyera që kompania e ladfillit të Fierit u ka nënkontraktorëve të ndryshëm.
Discussion about this post