Ish-kryeministri Sali Berisha ka komentuar sërish incidentin e ndodhur ditën e djeshme në Kuvend me kreun e grupit parlamentar të PD, Enkeled Alibeajn duke thënë se ishte kurth nga kryeministri Edi Rama.
Berisha tha se pas fjalimit të kryeministrit, me rregullore fjala i takonte atij për të replikuar por në momentin që u nis drejt foltores socialistët nxorën Alibeajn të cilin e quan “vegël të keqpërdorur të mazhorancës”.
“Së pari njëherë dua ta sqaroj, është një kurth banal që Rama e krijoi për të më privuar nga e drejta e replikës për diskutimin e tij, keqpërdoi Enkeled Alibeajn për të dytën herë në mënyrën më të pamëshirë. Rama foli dhe gjatë fjalimit të tij lakoi dhjetëra herë emrin tim, rregullorja e përcakton në mënyrë taksative të drejtën e përgjigjes, dhe ajo e drejtë ushtrohet menjëherë pas folësit të parë. Në këtë kontekst e drejta e replikës dy minuta më takonte mua. Unë u nisa dhe nxorën me vrap veglën e tyre. Kush ndërhyri, shiheni pak! Taulant Begoja ndërhyri, haptas në mbrojtje të një njeriu të keqpërdorur që s’mund ta bënte kurrë atë akt sepse e dinte se kujt i takonte fjala. Shkoi aty sa kërkoi 5 minuta pushim, para një muaj në mënyrë të neveritshme u përsërit i njëjti skenar”, tha Berisha.
Discussion about this post