Ambasadori i Bashkimit Europian, Luigi Soreca ka kërkuar dyfishim të përpjekjeve nga Shqipëria për të hyrë në BE.
Ai u shpreh se nevojitet më shumë punë në fushat që ka evidentuar Komisioni Europian, si lufta kundër krimit dhe korrupsionit, liria e medias, etj.
Në aktivitetin e hapjes së Shkollës së Integrimit Europian 2021, Soreca deklaroi se BE i jep mesatarisht 100 mln euro çdo vit Shqipërisë për transformimin e nevojshëm. Ai shtoi se investimi i BE-së gjatë 15 viteve të fundit ka arritur shifrën 1.5 miliard euro në grante, donacione dhe ndërtimin e infrastrukturës së nevojshme.
“Rekomandimet që jepen në raportin e KE identifikojnë fushat për të cilat duhet të ketë më shumë punë, si historiku për luftën kundër krimit dhe korrupsionit, liria e medias dhe të drejtat e pakicave janë një udhërrëfyes jo vetëm për qeverinë por dhe gjithë institucionet që të fokusohen gjatë javëve në vijim.
Shqipëria duhet të dyfishojë përpjekjet e saj, të ketë atë shndërrim socio-ekonomik që i duhet vendit dhe të bëhen bashkë të gjithë aktorët nga pjesët e ndryshme të politikës në Shqipëri dhe gjithë segmentet e shoqërisë dhe kjo është vlera e shtuar që sjell Këshilli Kombëtar. Procesi i integrimit po ndodh çdo ditë këtu në Shqipëri. BE mesatarisht i jep Shqipërisë çdo vit 100 mln euro duke kontribuar për këtë transformim të gjithë sektorëve të shoqërisë. Ky investim që gjatë 15 viteve të fundit ka arritur shifrën 1.5 miliard euro në grante, donacione, para të dhëna, ka ndërtuar infrastrukturën madhore të Shqipërisë“, tha Soreca.
