Agjenti i Alphonso Davies, mbrojtësi i majtë i Bayern Mynihut, ka folur për një interes të mundshëm të Real Madrid për lojtarin e tij dhe është krenar, edhe pse për momentin nuk mund të konfirmojë asgjë, pasi ai ka një kontratë me skuadrën bavareze.
“Real Madridi është një klub i madh dhe unë kam qenë gjithmonë një tifoz i këtij klubi. Ka pesë klube të mëdha në botë dhe Bayern është gjithashtu një prej tyre.
Real Madrid ka një emër të madh, është një markë e madhe, ata kanë 14 tituj të Ligës së Kampionëve dhe kur dëgjoj këto thashetheme për interesimin ndaj një lojtari që unë përfaqësoj, është gjithmonë një arsye për t’u ndjerë krenar”, tha Nedal Huoseh, përfaqësuesi i Alphonso Davies.
Përfaqësuesi i kanadezit ka folur në një intervistë për Fabrizio Romano dhe ka lënë disa detaje interesante për thashethemet që kanë dalë për lojtarin e Bayern:
“Edhe pse nuk ka asgjë konkrete me askënd. Dy klube fillimisht duhet të fillojnë bisedimet. Dhe nëse duan të shesin, sigurisht, pala e tretë është lojtari. Nuk e di se sa larg kanë shkuar bisedimet mes Bayernit dhe klubeve të tjera. Ai është i fokusuar te Bayerni, ai dëshiron të fitojë një tjetër Champions League dhe është i fokusuar në atë që ndodh në fushë”.
“Nuk kemi marrë asnjë vendim përfundimtar. Ne kemi një kontratë dyvjeçare me Bayernin. Ka shumë thashetheme në media. Por për momentin nuk mund të konfirmojmë asgjë”, përfundoi përfaqësuesi i Davies.
Discussion about this post