Interi është përpara Milanit edhe për milionat e arkëtuar. Por ky është një klasifikim që në fakt i bën të lumtur të gjithë.
Kualifikimi në fazën e 1/16-ave të Champions-it vlen sa një minierë ari. Nëse zikaltrit do të konfirmohen në vendin e katërt të klasifikimit do të merrnin në arkat e tyre 85 milionë euro, të cilave do t’ju shtoheshin edhe 2.1 milionë nëse mundin Monakon. Kuqezinjtë lundrojnë në shifra më të ulëta, por të konsiderueshme: 73 milionë euro në rast se konfirmohen në vendin e gjashtë dhe 2.1 të tjera në rast triumfi me Dinamon e Zagrebit.
Premiot e UEFA-s janë të shumë të pasura dhe formula e re ka garantuar 4 miliardë e gjysmë euro si bonuse dhe 2.5 miliardë që shpërndahen për 36 skuadrat pjesëmarrëse.
Zikaltrit, falë edhe klasifikimit të “market pool” janë në krye të klasifikimit mes 5 italianeve. Nëse futemi në detaje: Pjesëmarrja sjell 18.6 milionë euro për secilën skuadër, ndërsa rezultatet kanë sjellë 11.2 milionë.
Pastaj është edhe renditja historike në UEFA, që për Interin vlen 8 milionë euro. Ndërkohë që “market pool” për Interin vlen 25 milionë euro. Dhe në fund është klasifikimi. Vendi i katërt do të thotë 9 milionë euro. Të marrësh një vend mes 8 të parave shton në arka edhe 2 milionë euro të tjera, ndërsa kualifikimi në fazën e ardhshme sjell 85 milionë euro.
Në rast të një fitoreje me Monakon do të shkojnë 87 milionë. Në rast se zikaltrit do të ngrenë trofeun, ashtu siç kanë shpallur objektivin do të arkëtonin 140 milionë euro, pa llogaritur sponsorët dhe të ardhurat e tjera.
E thënë ndryshe, Championsi është një mundësi e artë që skuadrat të përfitojnë dhe të pasurohen. Një projekt ambicioz dhe serioz sigurisht që shërben për të hedhur baza të forta ashtu siç po bën Interi. Gjatë kësaj kohe zikaltrit kanë përfituar edhe nga të ardhurat e stadiumit, ku tifozët nuk kanë zhgënjyer duke mbushur shkallët.
“Oaktree” është duke buzëqeshur sepse kërkon që të vazhdojë të ketë një skuadër fituese dhe ambicioze jo vetëm në Itali, por edhe në Europë. Me këtë ecuri, Bepe Marota dhe të tijtë sigurisht që e kanë më të lehtë.
Ndërkohë që gjatë kësaj kohe klubi kampion i Italisë ka arritur një marrëveshje me “ZAIN KSA”, kompani në Arabinë Saudite. Kjo është marrëveshja e parë që zikaltrit bëjnë në këtë shtet duke hedhur baza të shëndosha për të ardhmen.
Discussion about this post