Interi ndjek hapin e Napolit duke triumfuar në Cagliari

Inter ka bërë detyrën në “Monday Night-in” e javës së dytë të Serisë A, duke triumfuar 2-0, në shtëpinë e Cagliarit.

Djemtë e Simone Inzaghit, pritej që të hasnin probleme ndaj një kundërshtari, që shpesh ka hapur probleme për zikalëtrit, por këtë herë çdo gjë u zgjidh në 45 minutat e para të takimit.

Në “Cagliari Arena”, Inter realizoi dy golat e ndeshjes, brenda 9 minutash. I pari që dërgoi topin në rrjetë për miqtë, ishte Denzel Dumfries, në minutën e 21’, duke përfituar në maksimum nga asistimi i francezit Marcus Thuram.

Cagliari i teknikut Claudio Ranieri, nuk pati kohë që të rikuperohej nga goditja e pësuar, me Interin që nuk vonoi shumë për të realizuar të dytin, falë “bomberit” Lautaro Martinez, i cili u tregua perfekt në aksionin personal, duke finalizuar në mënyrë fantastike.

Me këtë rezultat u mbyllën 45 minutat e para. Ne fraksionin e dytë të lojës, Cagliari nuk kishte asgjë për të humbur, duke tentuar që të gjente barazimin, por mbrotja e nën-kampionëve të Europës, ishte e pakalueshme, duke hipotekuar tre pikët e radhës.

Me këtë fitore, Inter mban hapin e Napolit, Veronës e Milanit, në krye, me të 4 skuadrat që kanë nga 6 pikë./m.b /gijotina.com