Me sezonin 2022-2023 që po shkon drejt fundit, drejtuesit e Interit po monitorojnë merkaton për të gjetur mundësitë e duhura për të përforcuar organikën gjatë verës për sezonin e ardhshëm. Në shënjestrën e klubit lombard janë padyshim përforcimet cilësore dhe ekonomike dhe një i tillë është Nacho Fernandez, mbrojtësi i Real Madridit, kontrata e të cilit skadon në muajin qershor.
“Los Blancos” i kanë ofruar rinovimin njëvjeçar me opsion edhe për një tjetër vit, por kjo nuk e ka kënaqur spanjollin që nuk ndihet i vlerësuar.
Edhe pse me 33 vite mbi supe, Giuseppe Marotta dhe Piero Ausilio vlerësojnë eksperiencën e Nachos dhe kanë udhëtuar drejt Madridit në mars, kur kanë pasur me të një takim për t’i bërë propozimin e tyre, që ende ngelet për t’u zbuluar.
Sidoqoftë, mbrojtësi nuk i ka kthyer ende përgjigje propozimit të zikaltërve dhe po ashtu nuk u ka komunikuar drejtuesve madrilenë ende të ardhmen e tij.
Discussion about this post