Përpara ceremonisë së betimit të Donald Trump si president i SHBA-së më20 janar, Irani ka paralajmëruar administratën e re në Uashington për rrezikun e llogaritjeve të gabuara strategjike duke kërcënuar se do kishte një konflikt të zgjatur ushtarak.
“Kini kujdes, mos bëni ndonjë gabim strategjik apo llogaritje të gabuar”, tha Hussein Salami, komandanti i përgjithshëm i Korpusit të Gardës Revolucionare Islamike (IRGC), pa përmendur drejtpërdrejt emrin e Trump.
“Armiku ndoshta beson se Irani është dobësuar. Por, vendi është ushtarakisht i përditësuar dhe gati për betejat e mëdha dhe të zgjatura kundër armikut dhe aleatëve të tij në rajon”, tha Salami.
Pavarësisht këtyre deklaratave, ekspertët besojnë se Irani është në një pozitë të dobësuar. Pas zhvillimeve në Liban dhe ndryshimit të pushtetit në Siri, vendi po vuan nga probleme të theksuara politike dhe ekonomike.
Mungesa e energjisë dhe ndotja akute e ajrit kanë detyruar qeverinë të mbyllë shkollat, universitetet, bankat dhe institucionet publike javët e fundit.
Ekspertët kanë frikë se situata mund të bëhet edhe më kritike pasi Trump të marrë detyrën. Disa prej tyre, madje e konsiderojnë të mundshëm një sulm ushtarak nga Izraeli ndaj Iranit.
Për të parandaluar panikun në mesin e popullatës, Irani ka theksuar publikisht përmirësimin e logjistikës së tij ushtarake – në mënyrë që të ruajë imazhin e tij të fuqisë në rajon.
Discussion about this post