Ish deputeti, Erion Piciri që hyri në Kuvend nga lista e PD, pasi kjo e fundit la mandatet në shkurt 2019, ka hequr dorë nga rroga e tij prej 50% për 3 vite që prej kur mbaroi mandatin.
Me një letër drejtuar Kuvendit të Shqipërisë, ish-deputeti njofton se ka hequr dorë nga 25 milionë lekë të vjetra që ligji ua jep si shpërblim ish-deputetëve për një periudhë deri 3 vjeçare, pasi sipas tij, aktivizimi i tij në Kuvend ka qenë vullnetar.
“Sot përmbylla marrëdhëniet me Kuvendin e Shqipërisë, me heqjen dorë nga përfitimet financiare prej 25 milion lekësh të vjetra, që ligji ua jep si shpërblim ish-deputetëve për një periudhë deri 3 vjeçare. I gjithë aktiviteti im pranë këtij institucioni ishte dhe mbeti vullnetar, duke i lënë buxhetit të shtetit mbi 100 milion lekë të vjetra për ndihmat e tërmetit, biznesit dhe pandemisë”, shkruan Piciri në Facebook.
Që në momentin kur hyri në Kuvend, Piciri u shpreh se ka pranuar mandatin e deputetit, por jo rrogën. Asokohe ai shtoi se nuk e konsideron veten deputet, por vetëm një intelektual dhe zëdhënës publik në parlament.
