Ish-kryetari i Bashkisë së Lushnjes, Fatos Tushe i është drejtuar me një kërkesë të befasishme Gjykatës së Lartë, përmes të cilës synon shpalljen si të pavlefshme të disa përgjimeve që u bënë shkak për vendosjen e tij nën hetim. Kjo kërkesë vjen teksa SPAK ka përfunduar hetimet dhe e ka dorëzuar si të akuzuar në Gjykatën e Posaçme. Ish-kryebashkiaku që u shkarkua pas arrestimit, kundërshton autorizimin e përgjimeve telefonike dhe zgjatjen e afatit të tyre në shtatë raste, duke nisur nga shtatori 2020 e në vazhdim.
Në bisedat që më pas u bënë publike, tregojnë se si gjatë hetimit për tenderin 24 milionësh, kryebashkiaku në një rast komunikon me një shtetas të cilit i janë bllokuar ndërtimet nga një inspektor e për këtë ish-kryebashkiaku i sugjeron që ti flasë në emrin e tij. Sa i takon tenderit për të cilin janë nën akuzë edhe 10 zyrtarë të tjerë, hetimet tregojnë se pavarësisht punimet për rehabilitimin e një kanali vaditës nuk i kreu firma fituese, por një biznesmen që ishte lidhje e ngushtë e Tushes.
Ish-kryebashkiaku i akuzuar për korrupsion, më herët iu drejtua edhe Gjykatës Kushtetuese, duke kundërshtuar vendimin e Këshillit të Ministrave që e shkarkoi nga detyra, por pa kaluar shumë kohë u tërhoq nga kjo padi. Aktualisht Fatos Tushe mbahet si i paraburgosur pranë 313 dhe gjyqtarët paraprakë nuk kanë vendosur ende nëse do ta kalojnë dosjen ndaj tij për gjykim themeli apo do ta rikthejë për hetime të mëtejshme.
Discussion about this post