Ish-kryeprokurori i Krimeve të Rënda, Eugen Beçi, tha sot gjatë një interviste televizive se, lufta kundër krimit të organizuar në vendin tonë nuk është në nivelin e duhur. Sipas tij, organet hetimore në vend duhet të kenë një tjetër nivel përgatitje për të hetuar krimet e ndodhura. “Ne po flasim për disa persona që vijnë me master krimi në Shqipëri. Organet hetimore duhet të jenë të përgatitur për një stad tjetër”, tha Beçi.
Ai gjithashtu u shpreh se Shqipëria nuk mund të përballojë kaq shumë personazhe të botës së krimit, duke shtuar se krimi ka një nivel të lartë.
“Në kuptimin e kriminelëve, ata kanë filluar të mësojnë disa gjuhë të huaja, ndërsa organet tona ende nuk janë mësuar. Shqipëria nuk është treg që mund të përballojë kaq shumë personazhet e krimit të organizuar. Krimi i organizuar shqiptar ka marrë një hov që nuk duket fare në Shqipëri, por vetëm jashtë”, tha ai.
Ndërsa tha se vettingu në politikë është i nevojshëm por që nuk mund të arrihet aq lehtë.
