Ish-futbollisti i skuadrës së Tiranës, Sokol Bulku ka analizuar paraqitjen e kryeqytetasve në këtë fillim sezoni. Sipas tij, barazimi me Egnatian ishte një aksident dhe se Tirana ka potencialin për të fituar titullin.
“Kam parë Vllaznia-Teuta. Ndeshja më pëlqeu shumë. Kishte ritëm dhe them se do të jenë dy pretendente të denja. Plotëso këtu Tiranën, Partizanin dhe Laçin. Të pesta skuadrat janë shumë të forta, pa harruar ekipet e tjera. Do të jetë një kampionat shumë i luftuar.
Po shoh se është bërë tragjedi e madhe që barazoi Tirana me Egnatian. Jemi në javën e dytë. Është një skuadër e re. Nuk mund ta bëjmë traumë këtë fakt. Për më tepër që i mohuan penalltinë në fund të ndeshjes. Tirana duhet të jetë e qetë. Ka edhe 34 takime dhe mbi 100 pikë në lojë.
Të gjitha skuadrat kanë gabuar. Partizani, Vllaznia, Laçi. Fillimi kështu është. Sa të marrë masat skuadra dhe ekipi do të ecë. Në fund do të bëhen llogaritë. Ose më saktë pa parë një apo dy faza nuk mund të alarmohet askush te Tirana. Bardheblutë e kanë stofin e kampionit ashtu si edhe stolin. E njëjta histori vlen edhe për Partizanin apo ndonjë skuadër tjetër. Te Tirana është trajneri që do të mendojë për zgjedhjen dhe kjo është më se normale.”
