Barazimi i Manchester United përballë Sevillas në takimin e parë të fazës çerekfinale të UEFA Europa League ka lënë një shije të keqe në opinionin sportiv në Britani të Madhe.
Shumë analistë dhe ish-lojtarë kanë shprehur keqardhje për mënyrën si “Red Devils” e “hodhën në erë” avantazhin prej dy golash brenda pak minutash (për më tepër në fundin e ndeshjes e me dy autogola).
Edhe Peter Schmeichel, portieri legjendar i Manchester United, iu bashkua kritikave ndaj skuadrës më të titulluar në Kampionatin Anglez.
“Është rezultat i drejtë për shkak të mënyrës se si u zhvillua loja në pjesën e dytë. Lojtarët e Manchester United kanë humbur një mundësi shumë të mirë,” – pranoi danezi në “BBC Radio 5 Live”. – “Disa lojtarë duhet të shikojnë veten dhe të mendojnë nëse po kontribuojnë mjaftueshëm për ekipin. Ka disa lojtarë që duhet të kenë turp për paraqitjet e tyre.”
Tifozët e Manchester United ishin veçanërisht kritikë në rrjetet sociale ndaj Harry Maguire, i cili shënoi autogol në minutën e 93-të, duke devijuar një goditje me kokë nga Yousef En-Nesyri.
Discussion about this post