Ish-Presidenti Bamir Topi ka bërë një analizë rreth zgjedhjeve të 11 Majit. Sipas tij opozita duhet të jetë shumë e lumtur për humbjen e radhës.
“Ata duhet të jenë të lumtur. Dhe brenda tyre ndihen të lumtur”, tha Topi.
Në një intervistë televizive, ish-presidenti u shpreh se demokratët duhet të mbyllin përfundimisht raportin shpirtëror dhe politik me Sali Berishën.
Sipas tij ka një hipokrizi nga ana e Berishës në atë që demonstron në ditët pas zgjedhjeve.
“Ka një hipokrizi tanimë të konfirmuar të Sali Berishës për atë çka ai demonstron në ditët pas zgjedhjeve. Jo në sensin personal, por ka një shfaqje hipokrizie. Njeriu që e dinte dhe e perceptonte rezultatin në mënyrë shumë realiste, është ai. Këtu mbaron besimi që çdo njeri, demokrat, njeri i lirë në zgjedhjet e tij, pjesa gri, për më tepër intelektualët, po të kenë pak sens analize, duhet të mbyllin në mënyrë definitive raportin shpirtëror politik me Sali Berishën.
Nuk është çështje e një marrëdhënie personale, ato janë lënë pas, por flas këtu për interesin publik, interesi publik nuk është vetëm ditën që hedh votën, por interesi publik është mbrapa, a përfaqësohesh politikisht apo jo, a realizohen premtimet apo jo, a të kthehet besimi tek institucionet apo jo, a është ky shtet i partive apo i individit…
Ndërkohë që duhet të ishte, partitë politike në Parlament ndërtojnë shtetin e të gjithëve. Fakti që shoqëria shqiptare ndahet, edhe në ata që ndahen pjesë në zgjedhje gati-gati ekuivalente, tregon 2 gjëra, e para ky sistem nuk funksionon dhe nga ana tjetër tregon që ky shtet nuk është më i qytetarëve por është shteti i interesave politike dhe të njerëzve të lidhur me politikën.
Ata që kanë mbështetur mazhorancën janë në administratë, janë në punë. Pjesa tjetër kur i kthehet PD-së, “na latë rrugëve”!, çfarë do të thotë kjo: “Na latë rrugëve”?, do të thotë që ata kanë humbur besimin që kishin që me ardhjen e partisë do të riktheheshin në punë. Pra, deri këtu në këtë pikë ka ardhur…
E kemi bërë këtë analizë për situatën e Shqipërisë në vitin 2030. Këtu kam qenë kur të kam thënë zgjedhjet janë në 2025, ku është 2029-a që ai nuk e përmend? Ai tregon që e ka në xhep. Pse e ka në xhep? Sepse e ka të thjeshtë, rezultati përcaktohet në tavolinë sepse i tillë është sistemi. A ka anomali më të madhe që ti merr vota të duash dhe përkthehen në një mandat ose nuk përkthehen fare. Është anomali”, tha ai.
Duke folur sërish për PD-në dhe listat e saj të kandidatëve për deputetë, Topi tha se në ato të mbyllura Berisha ka vënë njerëz që garantojnë qëndrueshmëri në Parlament, teksa shtoi se Berisha ka qenë i bindur se do të mbetej në opozitë.
“Këta njerëz janë zgjedhur (në listën e mbyllur) për të garantuar opozitë të qëndrueshme në Parlament. Ai (Berisha) ka qenë i bindur që do të ishte në opozitë. Mënyra se si u luajt, për mua ka nxjerrë nga lista e kompeticionit politik në Shqipëri, pothuajse të gjitha partitë që morën pjesë në koalicionin humbës të Sali Berishës. Për më tepër 2-3 kryetarë partish zgjodhën të ishin në listën e hapur dhe morën një rezultat dramatik, që do të thotë se nuk u lejon atyre moralisht që të rikthehen politikisht në krye të partive. Ka një anomali gati totale të opozitës e cila sot përkthehet në një anomali institucionale të opozitës, sepse janë atje bashkërisht”, tha Topi.
Discussion about this post