Lufta e Rusisë me perëndimin vazhdon më ashpër se kurrë, në shekullin 21. Marrëdhëniet mes kremlinit dhe perëndimit në përgjithësi janë acaruar ndjeshëm pas nisjes së luftës në Ukrainë, me NATO-n që ka dalë hapur në krah të Kievit.
Administrata ruse, e udhëhequr nga Vladimir Putin, nuk ka treguar asnjë shenjë frikë, përballë fuqive perëndimore.
Shumë personazhe të politikës perëndimore janë shpallur “armiq të popullit rus”, duke u ndaluar që të hyjnë në territorin e Federatës Ruse. Shënjestra kryesore e Putin kanë qenë amerikanët, të cilëve iu është ndaluar hyrja në territorin e shtetit europianolindor.
Rusia ka ndaluar 500 shtetas amerikanë të hyjnë në territorin e saj, përfshirë ish-presidentin demokrat të SHBA-së, Barack Obama , si hakmarrje për sanksionet e vendosura nga Uashingtoni.
Ndalimi vjen “në përgjigje të sanksioneve anti-ruse të vendosura rregullisht nga administrata Biden”, tha Ministria e Jashtme ruse, duke shtuar se përfshinte edhe ish-presidentin amerikan.
Më herët gjatë ditës së sotme, SHBA njoftoi masa ndëshkuese ndaj dhjetëra kompanive dhe individëve rusë, me rastin e pushtimit të Ukrainës nga ushtria ruse, ndërsa dhe vetë G7 vendosi sanksione ndaj Moskës zyrtare. Duket se do të kemi përpara, një luftë shumë të gjatë.
Discussion about this post