Kryetari i Federatës Shqiptare të Futbollit në vitet 1982- 1988, Kristaq Miço, jep versionin e tij pse titujt e luftës nuk njihen.
Ai ka treguar disa vite më parë në një prononcim për “Top Channel” gjatë emisionit sportiv “Procesi Sportiv”, se në vitet që pretendojnë titullin dy herë Tirana dhe një herë Vllaznia, nuk janë zhvilluara kampionate, por turne fashistë.
“Në vitin 1939, me pushtimin e Shqipërisë, Partia Fashiste italiane, organizoi strukturat e saj në të gjithë vendin. U krijuan dy organizata rinie: rinia fashiste shqiptare dhe veprimtaria pas pune.
E para u mor me aktivitetet cilësore kombëtare, ndërsa e dyta me ato masive, që ishin shëtitjet turistike dhe aktivitetet kulturore.
U ngrit edhe një komision organizativ që drejtohej nga fashistët. Në vitin 1939 ata organizuar një aktivitet që e quajtën ‘Turneu Kombëtar i Futbollit’. Ata nuk morën përsipër të thoshin që po krijojmë ligën sportive shqiptare.
Mirëpo, ky ishte një aktivitet me tri ndeshje dhe kështu fitoi Tirana, por nuk ishte një kampionat i mirëfilltë apo ligë mbarëkombëtare. Kjo ndodhi brenda një muaji dhe e njëjta gjë u përsërit në vitin 1940.
Në këtë vit ndryshimi i vetëm ishte se nuk pati sistem eliminimi, por vajtje-ardhje dhe përfundoi për një muaj e gjysmë. Ndërsa në vitin 1941 nuk pati aktivitet fare, pasi u organizuan grupet komuniste dhe kishte probleme.
Partia Komuniste ngriti organizatën e rinisë dhe morën pjesë ekipe lagjesh, pasi nuk kishte kushte për kampionat. Në vitin 1942 pati sërish një turne në tri grupe, ku për dy javë mbaroi gjithçka dhe finalja Tirana-Vllaznia u mbyll në barazim.
Kjo ndeshje ju dha aforfe Tiranës, pasi Vllaznia nuk pranoi të kishte kohë shtesë, por të kalohej direkt te penalltitë. Në këto kushte, kampionatet e luftës nuk janë quajtur, sepse masa e parë që morën fashistët ishte shkrirja e federatës së sporteve që në prill 1939, ndërsa më pas në muajin maj mbyllën edhe gazetën ‘Sporti Shqiptar’”, ka thënë Kristaq Miço.
Discussion about this post