Finalja e Champions League për sezonin 2022-2023, do të luhet mes italianëve të Interit e anglezëve të Manchester Cityt. Të dy ekipet kanë patur rrugëtime të ndryshme, në lidhje me vështirësinë e kundërshtarëve që janë detyruar të mposhtin, në rrugën drejt Stambollit.
Interi, ka mposhtur skuadra si Porto, Benfica dhe Milan, me gjysmëfinalen ndaj rivalëve të qytetit, që ishte në fakt, ndeshja që kanë dominuar më shumë.
Nga ana tjetër, “The Citizens”, kanë matur forcat me RB Leipzig, Bayern dhe Real Madrid. Djemtë e Guardiolës, pavarësisht parashikimeve, nuk kanë hasur shumë vështirësi ndaj emrave të mëdhenj që kanë gjetur përpara (kryesisht Bayern e Real).
Në lidhje me finalen ka dhënë opinionin e tij, një ish-futbollist i shquar i Interit.
Braziliani, Ze Maria, ka folur për kualifikimin e “zikaltërve” në finalen e Champions League. Ai shprehu dëshirën që finalja të fitohet nga ish-klubi i tij.
“Inter luajti dy ndeshje të mira në derbi, e para e bukur dhe e dyta e vuajtur, por në fund fitoi dhe arrin në finale me një moral shumë të lartë.
Finalja do të jetë një ndeshje unike në të cilën lojtarët e dinë se duhet të japin shumë më tepër se zakonisht dhe shpresojmë që të mund të përsërisin atë që ndodhi me Mourinhon disa vite më parë. Lojtarët janë vënë në dispozicion për të arritur një qëllim shumë të rëndësishëm”- tha braziliani që si trajner, mbahet mend për aventurën e tij te KF Tirana.
Discussion about this post