Kreu i Partisë Demokratike, Lulzim Basha ka përcjellë mëngjesin e sotëm një mesazh, pak para nisjes së samitit të Partive Popullore Europiane.
Basha shkruan në Facebook se qytetarët e Ballkanit janë të emocionuar rreth mbledhjes së nesërme, pasi sipas tij, Evropa është destinacioni ynë.
“Qytetarët e Ballkanit Perëndimor janë të gjithë sy dhe veshë sa herë që ka një tubim të udhëheqësve të BE -së, plot shpresë për çdo derë që hapet dhe çdo dritë që shkëlqen përpara në lidhje me perspektivën e tyre evropiane. Evropa është ëndrra dhe destinacioni ynë”.
Kryedemokrati kthehet pas në kohë teksa kujton protestën e vitit ’90 që shënoi rënien e komunizmit, ku thotë se sot si 31 vite parë ne e duam “Shqipërinë si Evropa”.
“Isha 17 vjeç kur së bashku me të rinjtë dhe të rejat protestuam nën thirrjen “Ne duam Shqipërinë si gjithë Evropa”. Kjo thirrje e zemrave tona rrëzoi regjimin komunist. Sot, 31 vite më vonë ne vazhdojmë të dëshirojmë, të kërkojmë dhe të përpiqemi për Shqipërinë si gjithë Evropa”.
Ndër të tjera, Basha shprehet se nga ky samit pret mbështetje për sundimin e ligjit, më shumë ndihmë në luftën kundër korrupsionit dhe krimit të organizuar, mbështetje për zgjedhje të lira dhe të ndershme, dhe më shumë mundësi për të rinjtë dhe qytetarët.
