Një 26-vjeçar australian i quajtur Conor Briggs ka ndarë historinë e tij të dhimbshme pas përballjes me probleme të rënda kardiake që ai pretendon se u shkaktuan nga vaksinat kundër Covid-19.
Në moshën 23-vjeçare, pas marrjes së dozës së dytë të vaksinës Pfizer, ai u diagnostikua me perikardit, një inflamacion i membranës që rrethon zemrën.
“Net pa gjumë dhe ndjesia sikur dikush po shtypte gjoksin tim”
Conor rrëfen se pas dozës së dytë të vaksinës, përjetoi simptoma të rënda si ndjesi rëndese në gjoks, vështirësi në frymëmarrje dhe lodhje të jashtëzakonshme.
Edhe pas vizitave tek kardiologët, trajtimet e ofruara nuk sollën përmirësim të ndjeshëm, përveç rekomandimit të anti-depresantëve, të cilët ai refuzoi t’i përdorte, duke besuar se problemet e tij ishin fizike, jo mendore.
Familja e Conor-it ka shpenzuar më shumë se 100,000 dollarë për trajtime, por ai thotë se vetëm vizitat tek një osteopat i kanë sjellë përmirësim të dukshëm. Megjithatë, ai vazhdon të përballet me kufizime të mëdha fizike, si pamundësia për të qëndruar jashtë në ditë të nxehta apo për të ngjitur shumë shkallë.
“Jam afër dorëzimit, por mbështetja e familjes më shpëtoi”
Conor tregon se vuajtjet e tij fizike e çuan pranë vetëvrasjes, por mbështetja e familjes e ndihmoi të vazhdonte të luftonte. Në përpjekje për të rritur ndërgjegjësimin, ai merr pjesë në protestën “Forest of the Fallen” në plazhet veriore të Sidneit, ku tregohet historia e individëve që pretendojnë dëmtime nga vaksinat.
Conor është pjesë e një padie kolektive të drejtuar nga Dr. Melissa McCann kundër autoriteteve shëndetësore australiane për dështimin në përkujdesjen ndaj individëve që pretendojnë dëmtime nga vaksinat. Nga ana tjetër, Pfizer ka mbrojtur sigurinë dhe efektivitetin e vaksinës së saj, duke deklaruar se ajo ka shpëtuar miliona jetë në mbarë botën.
Discussion about this post