Bekim Haxhiu, pronari i autobusit ku humbën jetën 45 shqiptarë nga Maqedonia e Veriut, në një intervistë për median bullgare pohon se autobusi që u dogj në autostradën “Struma” në Bullgari, ka qenë në rregull dhe nuk ka pasur probleme teknike.
Haxhiu ka përjashtuar mundësinë që disa nga pasagjerët të kenë futur lëndë djegëse në autobus, ndërsa konfirmoi se ai dhe familja e tij kanë qenë pjesë e të njëjtit ekskursioni në Stamboll, por kanë udhëtuar me autobusë të tjerë.
Në kufirin bullgaro-maqedonas, në dalje nga Bullgaria, Haxhiu ka marrë vesh se autobusi i tij është aksidentuar dhe ka shkuar me taksi në vendin e aksidentit, ku edhe ka qëndruar për orë të tëra.
Ai nuk ka pranuar të komentojë hetimet, por tha se tre javë para aksidentit autobusi i është nënshtruar kontrollit teknik në Jug të Maqedonisë.
“Para se të niseshim për në Turqi, i bëmë shërbimin, e kontrolluam, madje kur arritëm në Stamboll dhe atje shkuam në shërbim për t’i kontrolluar”, ka sqaruar pronari i “Besa Trans”.
Ai mohon se në autobus ka pasur tuba karburanti, sepse benzina që ata kanë mbushur në Stamboll mjaftonte për të arritur në Shkup.
“Tuba ka në çdo autobus, por me ujë, çdo autobus duhet t’i ketë për çdo rast. Ky është ujë rezervë. Ka kontroll të rreptë të hyrjes në Bullgari, bagazheve, shoferit, gjithçka që transportohet”, tha Haxhiu.
Pronari i “Besa Trans” tha gjithashtu se drejtuesit e autobusit kanë qenë profesionistë me shumë përvojë, të cilët e kanë kaluar shumë herë këtë rrugë, dhe se dy shoferë mjaftojnë për të bërë 12 orë rrugë.
Ngjarja e rëndë ndodhi javën e kaluar ku një nga autobusët e “Besa Trans” u përplas me bordurat e rrugës dhe shpërtheu, nga ngjarje e cila humbën jetën 45 shqiptarë nga Maqedonia e Veriut, ndërsa hetimet vazhdojnë ende.
Discussion about this post