Instituti i Shëndetit publik ka treguar se niveli i vaksinimit ka rënë ndjeshëm në dy javët e fundit. Sipas të dhënave të publikuara, mesatarisht çdo ditë janë kryer rreth 6 mijë doza anti-Covid. Ngadalësimin e procesit Iria Preza nga Instituti i Shëndetit Publik e arsyeton me pushimet e festave të nëntorit.
“Mbulesa vaksinale me dy doza anti -Covid tek personat mbi 16 vjeç ka arritur në 42% ndërsa me një dozë 47%. Ndërkohë që nga një nëntori kur ka nisur aplikimi i dozës së tretë janë kryer mbi 85 mijë vaksinime kryesisht tek të moshuarit”, tha ajo.
Prej dy dhjetorit dozën e tretë mund ta kryej çdo person mbi 18 vjeç që ka kaluar gjashtë muaj nga doza e dytë. Ndërkohë brenda muajit vaksinën kundër Covid duhet ta marrin dhe punonjësit e administratës, të supermarketeve dhe qendrave tregtare pasi më 4 janar në punë do të paraqiten ose me kartë vaksinimi ose me test PCR negativ çdo javë.
Discussion about this post