Vdekja e Aleynas, 18-vjeçares nga Turqia, e cila ra nga kati i pestë i një apartamenti ditën e shtunë, po hetohet nga policia, pasi është gjetur një letër ku ajo akuzonte vjehrrin për abuzim seksual dhe vrasjen e saj.
“Gokhan Argin është përgjegjës për vdekjen time”- ka shkruar vajza në letër.
Sipas policisë, Aleyna kishte qenë prej kohësh në një lidhje me të birin e të akuzuarit. Por Gokhan, i cili punon në biznesin e ndërtimit, kishte shantazhuar Aleyna pasi kishte marrë fotot e zhveshura të saj në celularin e të birit.
Sipas akuzave, ai e kishte thirrur Aleyna në zyrën e tij dhe i kishte bërë shantazh me fotografitë dhe kishte abuzuar seksualisht me të.
Vajza shkruante se babai i të dashurit të saj i kishte thënë: “Kam fotot dhe videot e tua. Nëse nuk bindesh, do t’ia tregoj ato familjes tënde dhe miqve të tu. Të gjithë do ta dinë se cila je”.
Vajza raportohet se një ditë para vdekjes kishte bërë një ankesë në polici.
Por më pak se 24 orë më vonë, adoleshentja që raportohet se vuante nga depresioni, ishte gjetur e vdekur poshtë pallatit.
Gokhan Argin tashmë pretendon se kishte një lidhje të fshehtë me të dashurën e djalit të tij, pas publikimit të akuzave.
Pas hetimeve autoritetet arrestuan Gokhan me akuza nxitje vetëvrasjeje, plagosje, shantazh, ofendim dhe shkelje të privatësisë. Djali i tij u arrestua fillimisht por tashmë po hetohet në gjendje të lirë.
Ndërsa prindërit e dëshpëruar të Aleyna thonë se babai i të dashurit të vajzës e kishte shtyrë atë drejt vdekjes.
