Italia do të njoftojë së shpejti për heqje të kufizimeve nga koronavirusi, ka bërë me dije ditën e sotme kryeministri italian, Mario Draghi, teksa numri i rasteve të infektimit ka nisur të zvogëlohet nga dita në ditë.
Në Itali janë regjistruar më shumë se 147.000 viktima me koronavirus dhe 11.23 milionë raste të infektimit prej shpërthimit të pandemisë dy vite më parë.
Shumë kufizime, përfshirë ato në transport dhe restorante tashmë janë lehtësuar për të vaksinuarit, derisa kufizimet e ashpra vazhdojnë të aplikohen për ata që nuk janë të imunizuar.
Vendosja e maskës është e detyrueshme në ambientet e jashtme.
“Në javët në vijim ne do të vazhdojmë këtë rrugë të rihapjes. Duke u bazuar në të dhënat shkencore, ne do të njoftojmë për afatet e heqjes së kufizimeve aktuale”, ka thënë Draghi, në një deklaratë të publikuar nga zyra e tij.
Fushata shtetërore e vaksinimit konsiderohet e suksesshme, pasi më shumë se 80 për qind e njerëzve kanë marrë dy doza të vaksinave, dhe më shumë se 57 për qind kanë marrë një dozë përforcuese.
Nga ana tjetër, Draghi gjithashtu ka thënë se afati i pasaportës së vaksinës që tregon se dikush është vaksinuar, apo se është shëruar nga sëmundja, nuk do të ketë afat për personat që kanë marrë dozën e tretë.
Pasaporta e vaksinës është e domosdoshme për të marrë pjesë në shumicën e aktiviteteve në këtë shtet.
Qeveria ka marrë vendim ditën e sotme edhe për nxënësit që janë të vaksinuar të lehtësojë masën e karantinës.
Discussion about this post