Gjyqtari i Kukësit Sami Ujkashi, me kërkesë nga prokurori Xhevahir Lita, ka pushuar në mënyrë të paprecedentë të gjitha akuzat ndak ish-kryetarit të Këshillit të Qarkut të Kukësit, Abedin Oruçi. Ky i fundit u konfrontua fizikisht me efektivë të policisë, të cilët shkuan për të zbatuar urdhërin e arrestimin të tij. Ngjarja u zhvillua më 12 janar të vitit 2021, në hotelin e Oruçit, i cili bëri rezistencë duke nxjerrë armën ndaj policëve dhe u përlesh me 5 të tillë. Ai i shpëtoi burgut duke u arratisur, teksa nga arratia vuri kushte për vetdorëzimin e tij, duke kërkuar të mos hetohet nga Prokuroria e Kukësit, ndërkohë në të njëjtën kohë pretendoi se policët janë rrëzuar vet dhe nuk janë lënduar nga ai.
Abedin Oruçi rezultonte i shpallur në kërkim që nga viti 2020, për akuzat “Kundërshtimi i punonjësit që kryen një detyrë shtetërore ose një shërbim publik”, “Kanosja për shkak të detyrës” si dhe “Pushtimi i tokës”. Por pas kësaj përleshje me uniformat blu Oruçi konsumoi dhe dy vepra të tjera penale kanosje për shkak të detyrës dhe kundërshtim të punonjësit të policisë, ndonëse i mohoi. Dhjetë muaj më vonë nga ngjarja e bujshme, mbi të nuk rëndon më asnjë akuzë ndonëse ai ka pranuar publikisht që nu ka pranuar të arrestohet nga policia, për sa kohë çështja e tij ishte në duart e një prokuroreje, tek e cila Oruçi nuk kishte besim. E gjithë ngjarja duket se nuk ka mjaftuar për prokurorin e çështjes Xhevahir Lita, i cili ka kërkuar nga gjyqtari Sami Ujkashi të pushojë çështjen.
Discussion about this post