Izrael, shkëmbim zjarri në kufirin me Egjiptin, tre ushtarë të vdekur

Forcat e armatosura izraelite njoftuan se tre ushtarë izraelitë u vranë në incidente të veçanta kufitare më herët sot në kufirin jugor me Egjiptin .

“Sot në mëngjes ka ndodhur një incident sigurie në zonën e Brigadës Rajonale të Paranit. Dy ushtarë të Forcave të Mbrojtjes izraelite (IDF), një burrë dhe një grua, u vranë nga të shtënat me armë zjarri pranë kufirit (me Egjiptin). Episodi është duke u rishikuar. IDF po kryen kërkime në zonë”, tha forcat e armatosura izraelite në një deklaratë fillestare.

Faqja izraelite e lajmeve Ynet foli për një “incident të rëndë sigurie në kufirin me Egjiptin”. Ushtria izraelite fillimisht kishte refuzuar të konfirmonte këto vdekje, të cilat ishin raportuar nga mediat izraelite, për shkak se familjet nuk ishin njoftuar ende.

Pak kohë më vonë, forcat izraelite raportuan një incident të ri shkëmbimi zjarri, i cili rezultoi në vdekjen e një ushtari të tretë nga një person i armatosur që kaloi kufirin izraelit nga Egjipti. Personi i armatosur më pas u neutralizua nga izraelitët në shkretëtirën e Negevit, pasi ushtria njoftoi: “Gjatë një konfrontimi me një sulmues në territorin izraelit (…) ushtarët u përgjigjën me zjarr të vërtetë dhe e neutralizuan atë”.

Egjipti ishte vendi i parë arab që nënshkroi një traktat paqeje me Izraelin në vitin 1979. Megjithatë, kontrabandistët e drogës veprojnë përgjatë kufirit mes dy vendeve dhe vitet e fundit ka pasur shkëmbime zjarri mes kontrabandistëve dhe ushtarëve izraelitë të vendosur përgjatë kufirit.