Shumica dërrmuese e izraelitëve, 80% e tyre besojnë se Benjamin Netanyahu duhet të pranojë publikisht përgjegjësinë për dështimin që çoi në sulmin e Hamasit ndaj Izraelit më 7 tetor, sipas një sondazhi të botuar në gazetën Maariv dhe të kryer gjatë dy ditëve 18-19 tetor.
Udhëheqja e forcave të armatosura izraelite dhe shërbimet e sigurisë së brendshme, Shin Bet kanë marrë tashmë përgjegjësitë e tyre, ashtu si edhe ministrat e mbrojtjes dhe financave.
80% e izraelitëve mendojnë se Benjamin Netanyahu duhet të ndjekë shembullin, duke përfshirë 69% të votuesve të partisë Likud. Vetëm 8% e izraelitëve nuk mendojnë se duhet të mbajnë përgjegjësi.
Të pyetur se kush është më i përshtatshëm për kryeministër, 49% zgjedhin kreun e partisë së Unitetit Kombëtar Benny Gantz dhe vetëm 28% zgjedhin Netanyahun. Pjesa tjetër duket e pavendosur.
Sa i përket luftës në Gaza, 65% mbështesin një sulm tokësor në Rripin e Gazës, krahasuar me 21% që duken kundër.
Përveç kësaj, 51% e izraelitëve mbështesin një operacion ushtarak në shkallë të gjerë në frontin verior pas përleshjeve të ushtrisë izraelite me Hezbollahun dhe Hamasin në kufirin e Izraelit me Libanin, ndërsa 30% favorizojnë një operacion në shkallë të kufizuar.
Discussion about this post