Stiven Shpendi dhe Kristian Shpendi janë dy binjakët e talentuar në Itali, ku me skuadrën e Çezenës në Serinë C, po shkëlqejnë. Dy futbollistët do të mbushin 20 vjeç pas disa ditësh ndërkohë që mosha duket se nuk është problem për të qenë protagonistë me skuadrën e tyre.
Stiveni ka shënuar 12 gola dhe 2 asiste në 29 ndeshje ndërkohë që vëllai i tij ka shënuar 1 gol dhe 1 asist në 16 ndeshje. Të dy futbollistët luajnë si sulmues për skuadrën e Çezenës dhe tashmë do të kenë mundësi të luajnë në “Play Off” për të tentuar një biletë për në Serinë B.
Trajneri i Çezenës, Domeniko Toskano u shpreh për mediat se dy futbollistët janë rritur shumë. Ai vë në pah karakterin e tyre dhe sjelljen në fushë e jashtë saj.
“Verën e kaluar u fol edhe për mundësinë e rikthimit të tyre në Primavera, por pashë që ishin gati. Isha i bindur se do të na jepnin një dorë të madhe. Ata donin të rriteshin tashmë e kanë bërë këtë. Janë të vetëdijshëm për cilësitë e tyre.
Punuan shumë për të qenë në nivelin e grupit, me meritën e të qenit si sfungjer në thithjen e këshillave të më të mëdhenjve. Ata gjetën edhe një grup mund të priste maturimin e tyre”, shprehet Toskano./PanoramaSport
Discussion about this post