Në foto është makina Porsche Cayenne, e cila u përdor nga autorët e dyshuar të vrasjes së Lulzim Vishës më 24 janar, në Kamëz.
Makina rezulton e vjedhur në Elbasan pak kohë më parë dhe për të ka pasur denoncim.
Grupi hetimor ka përfunduar këqyrjen, në përpjekje të gjetjes së elementëve të provave për identifikimin e autorëve.
48-vjeçari Lulzim Visha, i cili u gjet i pajetë në një makinë mëngjesin e kësaj të premteje, i vrarë me armë zjarri, dyshohet se ka pasur hasmëri me persona të tjerë.
Burime thonë se viktima ka qenë person që ka pasur probleme dhe pista e hasmërisë duket si më e mundshmja për hetuesit. Para disa viteve, vëllai i tij, Besnik Visha, më 10 prill të vitit 1997, ka vrarë Refik Domin te Universiteti Bujqësor.
Kjo është pista kryesore që po heton policia. Një tjetër pistë që grupi hetimor ka ngritur dhe po e verifikon është ajo e një konflikti që dy vellezërit kanë pasur në muajt e fundit me disa persona të tjerë në zonën e Zall Mnerit.
Visha u gjet pa shenja jete brenda automjetit në rrugën “Shën Stefani”, në Zall Mner rreth orës 7:40 këtë mëngjes. Policia tha se po punon për identifikimin dhe kapjen e autorit/ëve.
Mësohet se ai punonte postier dhe është gjetur i vrarë brenda makinës së kompanisë së postës private ku punonte. Ngjarja është lajmëruar nga një banor i zonës i cili ka telefonuar policinë. Grupi hetimor ende nuk e di orën me saktësi kur ka ndodhur krimi.
Discussion about this post