Dëshmia e Klodian Çalamanit, që vrau ditën e djeshme në mënyrë monstruoze 8-vjeçarin në Fier, është bërë publike.I pyetur nga hetuesit e çështjes lidhur me dinamikën e ngjarjes dhe motivin e krimit, gjithçka autori ka thënë është vetëm fjala “NDODHI”, duke mos zbuluar asnjë detaj mbi ngjarjen e rëndë.Nga burimet mësohet se në banesën e 38-vjeçarit përveç xhupit të gjetur të të miturit që çoi hetuesit në gjetjen edhe trupit të tij, janë gjetur edhe disa lodra. Nuk dihet nëse ato kanë qenë të Mateos apo lodra që janë gjetur rastësisht në banesën e Çalamanit. Ndërkohë, në ditët në vijim pas qetësimit të situatës pritet që në pyetje të merren edhe familjarët e viktimës.
Sipas policisë, nga hetimet e kryera dyshohet se, Klodian Çalamani e ka goditur me send të fortë (kazmë) në kokë, fëmijën e mitur dhe më pas e ka groposur atë në oborrin e banesës së tij.Nga këqyrja e vendit të ngjarjes janë gjetur dhe sekuestruar në cilësinë e provës materiale: një lopatë, një kazmë, një biçikletë, rroba të autorit dhe njolla gjaku, të cilat u dërguan për ekzaminime të mëtejshme në Institutin e Policisë Shkencore Tiranë.
Policia tregon se është njoftuar për humbjen e të miturit nga e ëma e tij, e cila i ka telefonuar rreth orës 14:40, duke iu thënë se djali i saj i mitur i vitlindjes 2013, kishte dalë që në orën 08:00 nga shtëpia dhe nuk ishte kthyer më në banesë. Më pas, rreth orës 15:30, e ëma është paraqitur për të bërë kallëzim për humbjen e djalit të saj.
Pas kësaj telefonate policia e Fierit është organizuar në terren për kërkimin e të miturit dhe si rezultat kanë bërë të mundur gjetjen e vendit të dyshuar ku mund të ndodhej fëmija i humbur.
Policia tregon se trupin e pajetë e gjetën teksa kontrollonin në ambientet e banesës së autorit të krimit, Klodian Çalamani, i cili kishte mbuluar viktimën me baltë në oborrin e shtëpisë.
Discussion about this post