Ja sekreti që e ka bërë Håland një “asgjësues”

Edhe pse vetëm 23 vjeç, Erling Håland konsiderohet si një nga sulmuesit më të mirë, në mos më i miri në botë.

Është thjesht e mahnitshme se sa lehtë ai i shënon golat në ligën më të fortë në botë, Premier League, si dhe Champions League. Ai është një bishë e vërtetë në fushë dhe arsyeja pse sillet si një terminator, së bashku me një dietë të zgjedhur me kujdes, është fiksimi i tij i pabesueshëm pas disa gjërave, shkruan “The Sun”.

Norvegjezi kujdeset mirë për trupin e tij dhe prej kohësh dihet se ka një sistem specifik dhe plan ditor që përfshin një dietë të veçantë. Tani është zbuluar se norvegjezi është i fiksuar pas cilësisë së gjumit të tij. Håland beson se gjumi është më i rëndësishëm se çdo gjë në jetë dhe është i bindur se një pushim i mirë përmirëson performancën e tij në fushë.

Sulmuesi i Manchester Cityt shkon gjithmonë në shtrat nga ora 22:00 deri në 22:30, përveç rasteve kur luan ndeshjet e Champions League.

Ai i fik të gjitha pajisjet elektronike shumë kohë përpara se të shkojë në shtrat dhe është i paarritshëm për askënd derisa është në gjumë.

Gjatë natës, ai mban një pajisje speciale në gishtin e tij që mat cilësinë e gjumit, ndryshimin e temperaturës, stresin dhe rrahjet e zemrës. Pajisja e ngjashme me unazën kushton 400 dollarë.

Eksperti i shkencave sportive Callum Walsh komentoi obsesionin e Håland.

“Ai është një version ekstrem i Zlatan Ibrahimoviç. Le të themi se ai është në nivelin e Cristiano Ronaldos në të gjitha aspektet .”

Gjithashtu, për orë të tëra para se të dalë, Håland mban syze portokalli të dizajnuara posaçërisht që bllokojnë energjinë e lartë të emetuar nga dritat natyrore dhe ekranet dixhitale.

Është gjithashtu interesante që Håland zgjohet me tingullin e himnit të UEFA Champions League.