Mbi 29 mijë punonjës janë larguar nga sektori i bujqësisë në vend drejt emigrimit. Ky sektor ka nevojën më të madhe për fuqi punëtore, por kushtet dhe pagat i ka në nivelin më të ulët nga të gjithë sektorët e tjerë. Sipas ekspertit, të politikave bujqësore Ilir Pilkun, ulja e krahut të punës do vazhdoj akoma nëse qeveria nuk përmirëson kushtet dhe rrite transparencën për këtë sektor.
“Në radhë të parë është mungesa e planeve të mirëfillta për zhvillimin e bujqësisë, nuk kemi studime të mirëfillta tregu. Ajo që shikohet sot në zonat rurale dhe në zonat e bregdetit ku janë aktivitete si agrumet, vreshtaritë ne kemi një problematikë të jashtëzakonshme në gjetjen e fuqisë punëtore. Nuk ka incentiva dhe qëndrueshmëri në sektorin bujqësor, kjo është një nga arsyet që individët në zonat rurale ndihen më të sigurt duke shkuar në emigracion qoftë edhe me punësime sezonale. Marzhet e fitimit të bujqësisë në prodhimin primar nuk janë kaq të larta sa ne të jemi konkurrues në paga në raport me vendet fqinje”, u shpreh ai gjatë një interviste televizive.
Sipas ekspertit, në mënyrë sa më urgjente qeveria duhet të vërë në zbatim politika të reja për të rregulluar tregjet, rritur pagat dhe reduktuar informalitetin në këtë sektor.
“Duhet një plan më i mirë zhvillimi për bujqësinë, kryesisht një orientim më të mirë të fermerëve që lidhet me produktin, varietetin dhe skedat teknologjike që do rrisnin automatikisht efikasitetin e bujqësisë duke bërë që të sjellë edhe paga më të larta të fuqisë punëtore. Mbështetje financiare dhe incentiva për të rinjtë që të qasen drejt bujqësisë”, tha ai.
Eksperti vuri në dukje se, është e padrejtë që ky sektor kamë shumë vështirësi dhe punonjësit e tij të paguhen më pak, madje shumica e më madhe të pasiguruar.
