Për të mbuluar abuzimet që bënë më barrën fiskale mbi bizneset, kryeministri Rama përdor ndërmarrjet e vogla si objekt për propagandë. Teksa prezantoi këtë pasdite paketën fiskale për biznesin e vogël, ditën e sotme Rama u mburr duke thënë se, fal reduktimit të taksave numri i bizneseve të vogla është rritur gjatë 2021. Sipas kryeministrit në këtë vit janë çelur 2400 biznese të vogla në vend, madje ai thotë se pjesa më e madhe e tyre janë implementuar në procesin e fiskalizimit.
“Sot ne kemi shifrën tjetër të rëndësishme për rimarrjen e gjithë ritmit nga biznesi i vogël pas mbylljes dramatike nga pandemia dhe faktikisht në tetor 2021 kur është bërë edhe numërimi më i fundit, janë 2400 biznese të vogla më shumë se sa përpara mbylljes nga pandemia. 67 për qind e bizneseve të vogla janë me certifikatë elektronike, dhe 30 për qind e bizneseve të vogla që lëshojnë faturë fiskale”, tha Rama.
Por, të dhënat reale të publikuara nga Qendra Kombëtare e Biznesit tregojnë hapur se Rama po manipulon të dhënat, për t’i përdorur për propagandë. Pasi bëhet me dije se rreth 2400 biznese kanë ulur qepenat në pjesën e parë të këtij viti, ndërsa mbi 4200 sipërmarrje të tjera kanë kaluar në status pasiv. Por nuk mbaron më kaq. Të dhënat e QKB tregojnë se gjendja e bizneseve të vogla gjatë këtij viti është edhe më keq e 2020, pasi gjatë pandemisë u mbyllën vetëm 1500 biznese, ndërsa në këtë vit ka falimentuar dyfishi vetëm për pjesën e parë.
Situata duket edhe më rëndë po të marrim faktin se mbi 32 mijë biznese të tjera janë drejtë falimentimit. Në raportin e publikuara nga Drejtoria e Përgjithshme e Tatimeve bëhet me dije se 32042 bizneseve në të gjithë vendin iu janë bllokuar llogaritë bankare dhe transaksionet për shkak se nuk kanë paguar detyrimet ndaj saj dhe janë zhytur në borxhe. Drejtoria e Tatimeve thekson se, ka vendosur marrjen e masave të sigurimit mbi të gjithë pasuritë për ekzekutimin e detyrimeve dhe se ka filluar procedura e mbledhjes me forcë të tyre.
Pra regjistrimi i bizneseve të reja nuk përbën ndonjë fakt pozitiv, duke marrë parasysh numrin e ulët dhe se ky është një fenomen që ndodh çdo vit. Ndërsa falimenti i bizneseve në këtë vit po thyen rekord, duke marrë parasysh se deri në fund të vitit numri do të rritet. E.H/ gijotina.com/
Discussion about this post