Shpend Lleshi ka dhënë dëshminë e tij për grupin hetimor, lidhur me grabitjen e banesës së tij në Klos gjatë mëngjesit të sotëm. Ai dhe nëna e tij 80-vjeçare u sulmuan nga 5 persona, të cilët i dhunuan e lidhën me litar. Lleshi, i cili ka pësuar më shumë se 6 plagë në kokë, ka treguar se fillimisht dëgjoi zhurmë në dritaren e banesës e më pas u sulmua nga agresorët.
“Jemi të tmerruar. Dëgjova zhurmë te dritarja e shtëpisë. Nuk e kuptoj si arritën ta hapin aq shpejt. Erdhën te krevati ku flija unë. Më goditën fort në kokë. Vajtën edhe te krevati i nënës. E sulmuan edhe atë. Bërtitën me zë të lartë ‘mos lëvizni”, tha Shpend Lleshi.
Ngjarja e rëndë ndodhi rreth orës 2 të mëngjesit. 5 persona të armatosur kanë hyrë me dhunë në banesën e Përparim Lleshit në fshatin Dom të Klosit ku pasi kanë dhunuar, torturuar e lidhur familjarët kanë grabitur 8 mijë euro, 1 milion lekë shqiptare dhe sende me vlerë.
Sipas dëshmive nënë e bir janë goditur disa herë me qytën e kallashnikovit ku për pasojë u janë shkaktuar dhe fraktura të rënda. Sipas informacione dyshohet se në këtë ngjarje të ketë dhe persona të tjerë të përfshirë të cilët mund të kenë qëndruar jashtë për të bërë roje. Deri më tani Policia ka bërë shoqërimin e 6 personave si të dyshuar apo që mund të kenë dijeni për ngjarjen.
Discussion about this post