Investimi i “Rai” për marrëveshjen Rama-Meloni dhe afera “5D” ishin lajtmotivet në fjalimet e kryedemokratit Sali Berisha gjatë protestës së kësaj të hënë, poshtë banesës së tij.
Berisha u shpreh gjatë fjalës së tij në tubimin që sot shënoi ditën e 112, se dokumentari i RAI faktonte se Olsi Rama ishte eksponent kryesor i klanit të “Hakmarrjes për Drejtësi” të kokainës së Xibrakës.
Kreu i opozitës tha se prokurorët që amnistuan Olsi Ramën, të cilët sipas tij, fshehën dokumentet e kalimit 18 herë të kufirit me makinën e drogës dhe filmime e fotografime të tij në mbledhjen me Xhixhën, Gjonajn dhe Ermal Hoxhën, u shpërblyen.
Ai deklaroi se Rama ia ka besuar lidhjet me krimin Engjëll Agaçit, të cilin e cilësoi një mafioz të zhytur në vjedhje dhe abuzime.
Kryetari i Partisë Demokratike iu drejtua Erion Veliajt që të japë dorëheqjen, ndërsa shtoi se gjyqi për largimin e tij do të bëhet ditën e premte në “Sheshin Skënderbej” – duke iu referuar protestës së radhës për dorëheqjen e kryebashkiakut.
Berisha paralajmëroi policinë që të mos përndjekin dhe të arrestojnë në mes të natës demokratët. Ai shtoi se, në qoftë se do të shndërrohen në mercenarë të Ballës, Ramës dhe Veliajt, do bëjnë zgjedhjen e gabuar.
Kryedemokrati u shpreh se beteja e demokratëve është me kriminelë si Taulant Balla, Edi Rama dhe Erion Veliaj.
Fjalimin e mbylli me një apel për qytetarët për tu bashkuar me opozitën në protestën për dorëheqjen e Veliajt të premten në 11:00.
“E premtja është dita e betejës fitimtare. Dita në të cilën Erion Veliaj do të nxirret për zverku nga bashkia. Dita në të cilën shqiptarët do të bëjnë betejën e tyre për kthimin e parave të vjedhura. Për kthimin e dinjitetit të tyre. Për kthimin e ligjit. Për rikthimin e bashkisë qytetarëve të Tiranës. Iu bëj thirrje të gjithë qytetarëve të Tiranës, të lënë çdo gjë ditën e premte. Të shkurtojnë oraret, të bëjnë gjithçka se e premtja fitimtare do ua shpërblejë atyre 1 mijë herë, 10 mijë herë me të mira për ata dhe mbarë shqiptarët. Duke u përshëndetur edhe njëherë përzemërsisht, uroj të premten, të gjithë te bashkia”, përfundoi kreu i opozitës.
Discussion about this post