Jep dorëheqjen Drejtori i Përgjithshëm i Burgjeve, Admir Abrija

Dorëhiqet nga detyra Drejtori i Përgjithshëm i Burgjeve, Admir Abria.

Mësohet se zyrtari i lartë është dorëhequr për shkak të një detyre tjetër.

Abrija mori drejtimin e burgjeve me propozim të ministrit të Drejtësisë, Ulsi Manja, më dhjetor të vitit 2021 pas lirimit nga detyra të Agim Ismailit.

Prej pak kohësh ai ka kërkuar dorëheqjenn për arsye personale, e cila është pranuar së fundmi nga ministri i Drejtësisë Ulsi Manja.

Pak kohë më parë në 15 dhjetor të vitit të kaluar ndodhi një nga incidentet më të mëdha në burgje, ku Sokol Mjacaj ekzekutoi Arben Lleshin.

Nuk dihet nëse kjo ngjarje ka ndikuar në rastin e dorëheqjes.

Kush është Admir Abrija?

Admir Abrija ka mbajtur një sërë postesh të rëndësishme, nga Garda e Republikës, te Dogana e deri si Prefekt i Tiranës. I diplomuar për drejtësi, Abrija ka edhe licensën e avokatit. Ai ka punuar si oficer sigurie i Gardës së Republikës në vitin 1999, dhe më pas është bërë zëdhënës i këtij institucioni.

Më vonë, ka punuar si Shef Sigurie në Presidencë, në kohën kur ky institucion drejtohej nga Bamir Topi. Ai ka shërbyer edhe në radhët e policisë, ku ka mbajtur edhe postin e drejtuesit, mes të cilave edhe Drejtorinë e Kufirit në Gjirokastër.

Më tej, Admir Abrija u emërua zëvendësdrejtor i Përgjithshëm i Doganave, ku kishte nën varësi sektorin e antikorrupsionit dhe hetimit. Pas këtij posti, ai do të emërohej si Prefekt i Tiranës, ndërsa sot i është besuar Drejtoria e Burgjeve.