Teksa janë mbushur pak orë nga vendimi i Kuvendit të Shqipërisë, për miratimin e kërkesës së Prokurorisë SPAK, duke dhënë autorizimin për arrestimin e ish-Ministrit të Financave njëherësh dhe ish-zv/kryeministrit, Arben Ahmetaj, tashmë dosja penale i është transferuar gjykatës.
Mësohet se materiali voluminoz për Arben Ahmetaj dhe persona të tjerë, është zbritur në gjykatë për analizim dhe tashmë vlerësimi final i arrestit, pritet të firmoset në vijim nga gjyqtari Erjon Bani.
Ky i fundit është gjykatësi që ndjek vijushmërinë e hetimeve paraprake të procedimit penal nr. 277/1 dhe domosdoshmërisht brenda javës që vjen duhet të dalë me një vendim gjyqësor, ku do pranojë ose jo arrestimin e Ahmetaj. Por mësohet se në këtë dosje nuk është vetëm emri i Arben Ahmetaj, por dhe i personave të tjerë.
Një burim pranë SPAK, tha për “Ora News” se mes personave të tjerë që është kërkuar arrestimi, mësohet të jetë emri i Mirel alias Klodian Mërtiri, Klodian Zoto, të cilët megjithëse janë shpallur në kërkim për inceneratorin e Elbasanit, tashmë akuzohen sërisht për episod tjetër penal.
“…duket se në total janë 6 deri në 8 persona që SPAK, ka kërkuar nga gjykata e posaçme vendosje e masës së arrestit…”- thanë burimet.
Sipas OraNews, SPAK ka kërkuar caktimin e masës së sigurisë edhe për Erjola Hoxhën, bashkëjetuesen e Arben Ahmetaj, e cila njësoj si Arben Ahmetaj është përfituesja kryesore e pasurive të rrjedhura nga vepra penale e korupsionit.
Arben Ahmetaj, akuzohet nga dy prokurorët e SPAK Altin Dumani dhe Enkelejda Millonai, për akuzën e “Fshehjes së pasurisë”, “Korrupsion pasiv” dhe “Pastrim i produkteve të veprës penale”.
Gjithashtu pjesë e listës, janë disa emra biznesmenësh, të cilët kanë përdorur “tranpolina” financiare për llogari të Arben Ahmetaj.
Disa nga biznesmenët, emra e të cilëve dolën dhe në relacionin që SPAK i vuri në dispozicion Këshillit të Mandateve, njësoj si Ahmetaj janë larguar nga Shqipëria, pas frikës së arrestimit të mundshëm nga SPAK.
Në rast se gjyqtari Erjon Bani, vendos të caktojë masën e “Arrestit në burg”, atëherë Arben Ahmetaj, e pret në Angli një përballje gjyqësore për ekstradimin ose jo të tij. Kjo pasi SPAK, do kërkojë me çdo kush ekstradimin e tij në Shqipëri me qëllim ballafaqimin me akuzat në gjykatë.
Discussion about this post