Ditën e sotme në media ka qarkulluar një lajm se vaksina “Covidshield”, e cila nuk është miratuar nga FDA dhe EMA dhe është e panjohur në disa vende, rezulton të jetë injektuar në disa pika vaksinimi, të paktën në Tiranë. Këtë e bën të ditur portali “Faktoje.al”, ku shprehet se nga investigimi që kanë bërë u ka rezultuar se këto vaksina janë prodhuar në Indi.
Vaksina ka një përdorim të gjerë në Indi dhe Afrikë, mund të ketë edhe në Europë, por që nuk është miratuar nga “EMA” dhe “FDA”.
Edhe shefja e programit të vaksinimit në ISHP, Erida Nelaj, në një intervistë për mediat e ka konfirmuar aplikimin e kësaj vaksine, e cila tha se bëhet fjalë për 50 mijë doza dhuratë e qeverisë indiane, e cila ka ardhur vetëm njëherë.
Nelaj garantoi efikasitetin e kësaj vaksine duke shpjeguar se është e njëjta patentë si “AstraZeneca”, por vetëm emërtimet janë të ndryshme, duke theksuar se pavarësisht se është nga e njëjta familje nuk njihet nga “EMA”.
“Në vetvete “AstraZeneca” dhe “Covishield”, është e njëjta gjë. Thjeshtë qarkullon me dy emërtime, në Indi është emri “Covishield”, por patenta është e “AstraZeneca”-s. Njihet nga Europa, por “Covishield”, nuk ka aplikuar në Europë, si me Sputnik dhe Coronavc. Ne kemi 25 mijë individë që kanë marrë “Covishield”, sepse janë identike, thjesht emërtimet janë për efekt të prodhuesve. Është njëlloj, por për “EMA”-ën ndoshta nuk është njëlloj. Për efikasitet është shumë e mirë, por “EMA” nuk e njeh” – tha Nelaj.
“Covishield” është vaksina e tretë që aplikon Shqipëria, e cila nuk njihet nga FDA dhe EMA, pas “Sinovc” dhe “Sputnik”, si dhe një rast tjetër i qeverisë pa e bërë transparent për publikun.
