Deputetja e PD-së, Jorida Tabaku ka reaguar në lidhje me raportin e DASH mbi klimën e biznesit.
Me anë të një postimi në Facebook, Tabaku thotë se ky raport tregon panoramën e një serie të gjatë të problemeve që përkeqësohen përditë e më shumë.
Sipas saj, “korrupsioni në Shqipëri është aq galopant saqë edhe procesi i transparencës në lidhje me ligjet është në nivelin më të ulët, aq sa bizneset as nuk lajmërohen në kohë me ndryshimet apo për ndryshimet në ligj”.
Me tej, Tabaku thekson se “ligjet janë të qepura për investitorët pranë qeverisë, parlamenti shërben si noter, PPP-të janë licenca për abuzimin me buxhetin dhe klima e biznesit përkeqësohet përvit. Një ekonomi që në vitin 2022 vazhdon të ketë 40% të saj informale nuk premton siguri dhe as qartësi”.
“Për aq kohë sa qeveria të jetë e angazhuar në manaxhimin e skandaleve që vijnë nga korrupsioni, shkatërrimi ekonomisë ne nuk do të mund të fokusojmë vëmendjen tonë në zhvillimin ekonomik që do të përkthehej në rritjen e mirëqënies”, thotë ndër të tjera Tabaku.
Discussion about this post