Një pjesë e bregut të Lumit Osum që kalon nëpër qytetin e Dimalit është bërë e rrëshqitshme, sepse bashkia nuk kujtohet ta mirëmbajë. Prej vitesh nuk është vënë dorë dhe në disa vende toka është shembur. Gjatë verës, kryebashkiakja Juliana Memaj nuk lëvizi asnjë gur, tani në fillim të dimrit, bën tenderin për një mur mbrojtës. Memaj ka zhvilluar një tender me objekt ‘Mbrojtje lumore në zonën e Dafinave, Bashkia Dimal’.
Sipas preventivit, punimet do të përfshijnë pastrimin e shkurreve buzë lumit, sistemimin me dhe e gurë në zonat ku ka rrëshqitje, si dhe shtresë betoni përgjatë kësaj pjese të dëmtuar e cila në total është 400 metra linear.
“Në krahun e djathtë të rrjedhjes së Lumit të Osumit në zonën e qytetit të Dimalit, përgjatë bregut në gjatësinë rreth 400 ml kanë ndodhur gërryerje të shpatit të lumit duke rrezikuar rrugën që ndodhet në krahun e djathtë të tij si dhe tokat bujqësore që shtrihen pas tij”, thuhet në dokument.
Bashkia do të paguajë 222 milionë lekë për këtë projekt, ndërsa Memaj kujdeset që paratë të shkojnë për kompaninë që favorizohet prej saj.
Shkelet ligji mbi prokurimet
Dhe pavarësisht se kryebashkiakja është në listën e SPAK nuk druhet, që të manipulojë tenderin. Në total janë dorëzuar 4 oferta për të marrë pjesë në këtë procedurë. Bashkimi Operatorëve Ekonomik “BESTA” sh.p.k., & “Llazo” sh.p.k., me ofertë 17,281,600 lekë kishin propozimin më të ulët, por janë skualifikuar që në fazën e parë. Komisioni paraqet argumentin se kanë ofertë “anomalisht të ulët”. Nuk e kuptojmë pse nuk mjaftojnë 172 milionë lekë për pastrim shkurresh e mbushje me dhe?
Ndërkohë menjëherë më pas u fshinë nga gara edhe 2 oferta të tjera, por pa asnjë arsyetim të bërë publik.
Kështu për në fazën finale doli vetëm bashkimi i operatorëve “ARDMIR” shpk – “ULZA”shpk, me pronarë respektivë Fatmir Çobo dhe Nikolin Shpani. Oferta e tyre ka vlerë 220 milionë lekë, pra shumë afër Fondit Limi. Por kryetares nuk i intereson të kursejë fondin e bashkisë. Prandaj është shpallur menjëherë fituese këtë ofertë pa garë fare. Për këtë Open Data Albania ka ngritur “Flamurin e Kuq”, që është shenja e riskut të korrupsionit.
Problemet e Memajt me drejtësinë
Në korrik të vitit 2022, kryebashkiakia e Dimalit, Juliana Memaj ka përfunduar në SPAK. Ajo akuzohej për “Shpërdorim detyre” dhe “Falsifikim dokumentesh”.
Gjykata e Beratit asaj kohe kishte përcjellë në SPAK vendimin për të hetuar kryebashkiaken e Dimalit Juliana Memaj pasi në vitin 2020 bashkia u prishi pronën familjes Baho nga fshati Poshnje të cilët bënë kallëzim penal ndaj Memaj. Bashkia Demal në mënyrë të kundërligjshme ia dha pronën një shtetasi tjetër.
Gjithsesi me mënyrat e saj Memaj e zgjidhi këtë çështje dhe vazhdon të jetë kryetare e Bashkisë. Ndërkohë, biznesmeni Nikolin Shpani rezulton se në vitin 2019 ka qenë mes disa biznesmenëve që janë arrestuar e shpallur në kërkim nga Prokuroria e Tiranës, pas zbulimit të një skeme të madhe mashtrimi me rimbursimin e TVSH. Kompani që kishin tjetër fushë aktiviteti dhe prisnin fatura për produkte e shërbime që as i ofronin.
Duke rimbushura fatura false, Nikolin Shpani arriti të fitonte 90 milionë lekë nga rimbursimi i TVSH, duke i shkaktuar dëm direkt buxhetit të shtetit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post