Merr fund kriza politike në Kosovë. Pas një periudhe ngërçi dhe negociatash mes forcave politike, Justina Shiroka-Pula është zgjedhur me 81 vota pro presidente e re e vendit, duke hapur rrugën për zhbllokimin e situatës institucionale.
Zgjedhja e Shiroka-Pulës erdhi pas zhvillimeve intensive politike dhe një propozimi të ri të kryeministrit Albin Kurti, i cili hodhi emrin e akademikes si kandidate për postin e kreut të shtetit.
Propozimi mori mbështetjen e nevojshme politike pasi kryetari i Partisë Demokratike të Kosovës, Bedri Hamza, bëri të ditur se PDK-ja e pranonte Shiroka-Pulën si kandidate, ndërsa kjo forcë politike paraqiti Eliza Hoxhën si kundërkandidate.
Marrëveshja u arrit pas një oferte të re të Kurtit, sipas së cilës Kuvendi do të trajtonte fillimisht ndryshimet në Ligjin për Dhomat e Specializuara dhe më pas do t’i hapej rruga procesit për zgjedhjen e presidentit.
Para votimit për kreun e ri të shtetit, Kuvendi miratoi në lexim të dytë ndryshimet në Ligjin për Dhomat e Specializuara. Projektligji mori mbështetjen e LVV-së, PDK-së dhe Aleancës, ndërsa deputetët e LDK-së nuk morën pjesë në votim.
Pas këtij zhvillimi, vëmendja u zhvendos te zgjedhja e presidentit dhe kandidatura e Justina Shiroka-Pulës, e cila ishte kthyer në pikën kryesore të kompromisit politik.
Justina Shiroka-Pula ka mbajtur fjalën e saj pas zgjedhjes Presidente e Republikës së Kosovës, duke u zotuar se do të jetë presidente e të gjithë qytetarëve, pa dallime politike, etnike apo shoqërore.
Pas betimit para deputetëve, Shiroka-Pula deklaroi se e pranon me nder të madh dhe përgjegjësi të plotë detyrën që i është besuar.
Shiroka-Pula theksoi se gjatë mandatit të saj do të angazhohet për unitetin, drejtësinë, zhvillimin dhe forcimin e institucioneve të Kosovës.
Në fjalën e saj, Shiroka-Pula vuri theksin edhe te orientimi euroatlantik i Kosovës dhe marrëdhëniet me aleatët, ndërsa u zotua për mbrojtjen e Kushtetutës dhe interesave të Republikës.
Ajo e përmbylli fjalën duke shprehur besimin te qytetarët dhe e ardhmja e Kosovës.
“Ky mandat nuk i përket vetëm një personi. Ai i përket qytetarëve tanë, institucioneve tona dhe shtetit për të cilin shumë breza u sakrifikuan. Do të jem presidente e të gjithë qytetarëve, pa dallim politik, etnik apo shoqëror. Do të punoj për unitet, drejtësi, zhvillim dhe përforcimin e institucioneve tona. Kosova duhet të ecë përpara si një shtet demokratik, i sigurt, me orientim të qartë euroatlantik dhe me miqësi të fortë me aleatët tanë. Do ta mbroj Kushtetutën, interesin e Republikës dhe dinjitetin e qytetarëve tanë. Besoj në Kosovën, besoj në njerëzit e saj dhe besoj se së bashku mund të ndërtojmë një të ardhme më të mirë për brezat që vijnë. Zoti e bekoftë Republikën e Kosovës!”, tha ajo.
Discussion about this post