Trajneri i Real Madrid, Carlo Ancelotti ka bërë një analizë të Seria A dhe disa prej ekipeve më të komentuara ndër vite të saj.
Teksa ka folur në një intervistë për “Radio Anch’io Sport”, tekniku jep një përmbledhje fillimit të sezonit në Serie A. Ai ka treguar se cilin prej ekipeve sheh si pretendentë të çmimit të madh të elitës së futbollit italian ku nuk harron të përmend Interin.
“Interi ka ruajtur strukturën e vitit të kaluar duke ndryshuar trajnerin dhe disa lojtarë të rëndësishëm, por mua më duket një ekip shumë solid. Luajti shumë mirë, ai na krijoi vështirësi, më duket një ekip me një entuziazëm të madh: ata mund të konkurrojnë për Scudetto-n ”.-u shpreh ai.
Më tej Ancelotti theksoi se Roma e Jose Mourinhos është duke bërë mirë dhe po ashtu mund të jetë një nga skuadrat më të forta të këtij sezoni.
“Ai gjeti një vend të përshtatshëm për aftësitë dhe cilësitë e tij të karakterit, menjëherë mendova se ishte vendi i duhur për të dhe në fund do të jetë, me të vërtetë shpresoj se Roma do të jetë në gjendje të fitojë me Mourinhon”-tha ai.
Ndërsa për Juventus italiani ka thënë se ka probleme, ndërsa ka humbur edhe sigurinë.
“Serie A është shumë e ekuilibruar. Juve është një ekip që ka disa probleme, ka humbur sigurinë dhe po përpiqet të gjejë një identitet të saktë. Në fund, megjithatë, unë mendoj se do të dalë dhe do të jetë ndër kandidatët për titullin.”-deklaroi ai.
Duket se ky sezon i Seria A ka për të sjellë surpriza dhe me ndryshimet e bëra gjatë merkatos së verës ende nuk dihet se cila skuadër është më e favorizuara./K.T/Gijotina.com
