Disa ditë më parë bordi dirigjues i Dinamos së Tiranës (së shpejti, “Dinamo City”) vendosi t’i besojë operacionet e merkatos një drejtori sportiv me eksperiencë dhe me emër për futbollin shqiptar si Haris Fakiç. Në fakt, boshnjaku e ka nisur punën prej ditësh, edhe pse klubi blu nuk ka bërë ende një zyrtarizim të tij në postin e rëndësishëm.
Fakiç ka qenë këto ditë në Tiranë, ku veç takimeve me drejtuesit e lartë të klubit ka qenë bashkë me trajnerin Di Biaxho dhe ndihmësin e tij, Memushaj, për të ndjekur në stadium miqësoren e Tiranës, kundërshtarit të parë të Dinamos në kampionat.
Media sportive shqiptare “Panorama Sport” mëson se vetëm dje drejtori i ri sportiv ka bërë prezantimin para skuadrës, ndërkohë që vazhdon punën për përforcimin e saj para mbylljes së merkatos.
Fokusi mbetet tek afrimi i një qendërmbrojtësi, të paktën një mesfushori qendre dhe një sulmuesi. Vetëm për këtë të fundit ka një emër dhe ai është Veton Tusha i Ballkanit, ndërsa për dy afrimet e tjera nuk ka detaje. Në merkaton e dytë të Dinamos për këtë verë, pas projektit të binjakëzimit me Mançester Sitin, janë afruar emra si Bekim Rexhepi, Baton Zabërgja, Lorenco Vila, Blend Krasniqi dhe Fatjon Andoni.
Në shënjestër janë edhe 3 goditje të tjera, që pritet t’i japin Dinamos profilin e një skuadre pretendente për në Kupat e Europës sezonin e ardhshëm./PanoramaSport
Discussion about this post