Ndryshe nga të pranishmit e tjerë që shprehën mbështetjen e plotë për Berishën dhe madje ardhjen e tij në krye të PD, Ish-deputeti i PD Fatbardh Kadilli ishte i vetmi që doli në një qëndrim ndryshe. Gjatë fjalës së tij sot në Kuvendin e PD i ka bërë thirrje Sali Berishës që t’i hapë rrugën një brezi të ri, duke u bërë kështu i vetmi zë ndryshe në Kuvendin e PD.
“Një gjë është e sigurtë: nëse PD do të mbetet peng e të njëjtave ide, e të njëjtave qasje dhe e të njëjtëve njerëz si në të shkuarën, shqiptarët nuk do e votojnë. Ne nuk mund t’i bëjmë bisht të vërtetës sonë: PD sot është PD-ja e vitit 2013. Për të koha ka mbetur në vend. Koha e shqiptarëve ka ecur përpara dhe e ka lënë PD-në pas. PD sot duhet të kapë të ardhmen. Për këtë arsye, dua t’i bëj thirrje edhe një herë tjetër Zotit Berisha që të hapë rrugën për një brez tjetër në krye të PD-së, i cili mund të vijë nga një garë e lirë dhe e vërtetë. Një garë ku merr pjesë zoti Berisha nuk është garë e vërtetë”, tha ai.
Gjithsesi ai nuk mohoi, madje falënderoi Berishën që arriti të mbante PD të bashkuar dhe e shpëtoi nga coptimi. “Por nga ana tjetër, do të isha hipokrit nëse nuk do të thoja se faktori tjetër për moscoptimin e partisë ishte përpjekja e suksesshme e Zotit Berisha, Rezultat i forcës dhe vullnetit të tij të paepur për të marrë në dorë kontrollin e partisë, është krijimi i një shumice thithëse në bazën e partisë”, u shpreh ai, duke thënë se tashmë PD do të vijë si një opozitë e vërtet, që nesër të jetë gati për të qenë në pushtet.
Discussion about this post