Kandidati për kryetar të PD-së, Fatbardh Kadilli, me anë të një statusi në “Facebook”, i ka bërë thirrje demokratëve dhe Lulzim Bashës që të marrin vendim të qartë në raport me ish-kreun e saj, Sali Berisha.
Sipas tij, e ardhmja e PD nuk duhet të jetë “non grata”.
“E ardhmja e PD-së nuk duhet të jetë “non grata”. PD duhet të ketë një qëndrim të qartë në raport me ish kreun e saj Sali Berisha. Nuk mund të presim vendime surprizë apo të minutës së fundit për një çështje që lidhet me fatin dhe të ardhmen e PD-së. As nuk mund të zvarritemi pa bërë asgjë.”- tha ai.
Kadillit u shpreh gjithashtu se Lulzim Basha duhet të flasë dhe të mos e lerë fatin e partisë në kryqëzime të rrezikshme politike.
“Berisha e ka bërë të qartë që fatin e PD-së do ta mbaj lidhur me fatin e vet “non grata”. Basha nuk flet duke e lënë partinë në kryqëzime të rrezikshme politike.
Është momenti të flasë partia çfarë qëndrimi ka për ish kryetarin “non grata”. Kjo është detyrë e Kryesisë dhe e Grupit Parlamentar. Për secilin koleg, është nder të ulesh në karrigen e kryesisë dhe të deputetit, por së pari është përgjegjësi. Keni në dorë të merrni një vendim historik. Luhet fati dhe e ardhmja e Partisë Demokratike që nuk duhet të jetë “non grata’”, thekson Kadilli.
