Përfaqësuesja e Lartë e BE-së për Politikë të Jashtme dhe Siguri, Kaja Kallas ka zhvilluar takime të ndara me kryeministrin e Kosovës, Albin Kurti dhe presidentin serb, Aleksandër Vuçiç, me të cilët ka biseduar për nevojën për të avancuar në normalizimin e marrëdhënieve mes dy vendeve.
Të tre po marrin pjesë në punimet e Asamblesë së Përgjithshme të Kombeve të Bashkuara.
Në një reagim në rrjetin social X, shefja e diplomacisë së BE-së thotë se marrëveshjet e arritura përmes dialogut dhe ajo e Ohrit janë të detyrueshme dhe se zbatimi i tyre nuk i bën nder Brukselit, por qytetarëve të Kosovës dhe Serbisë.
“Progresi në normalizimin e marrëdhënieve dhe avancimi në rrugën drejt BE-së duhet të shkojnë dorë për dore. Marrëveshjet e arritura përmes Dialogut të lehtësuar nga BE-ja, veçanërisht Marrëveshja e Ohrit, janë të detyrueshme.
Zbatimi i tyre nuk është një nder për Brukselin, por i detyrohet qytetarëve të tyre dhe një rajoni që pret marrëdhënie normale. BE-ja do të vazhdojë të jetë një arbitër i paanshëm. Por lehtësimi nuk mund të zëvendësojë vullnetin politik në Beograd dhe Prishtinë. Është koha për të ecur përpara.”, ka shkruar Kallas.
Discussion about this post