Kryeministri kanadez në largim, Justin Trudeau, ka hedhur poshtë propozimin e diskutueshëm të presidentit të zgjedhur të SHBA-së, Donald Trump, që Kanadaja të bashkohet me SHBA-në.
”Nuk ka fare mundësi që Kanadaja të bëhet pjesë e SHBA-së. punëtorët dhe komunitetet në të dyja vendet tona përfitojnë nga të qenit partneri më i madh tregtar dhe i sigurisë i njëri-tjetrit”, shkroi Trudeau në platformën sociale X.
Përgjigjja e kryeministrit kanadez vjen pasi Trump ngjalli polemika duke propozuar bashkimin, disa orë pasi Trudeau njoftoi dorëheqjen si kryeministër dhe lider i Partisë Liberale.
Ministrja e Punëve të Jashtme e Kanadasë, Melanie Joly, komentet e Trumpit i përshkroi si një ”mungesë të plotë të të kuptuarit” të forcës dhe identitetit të Kanadasë.
”Komentet e presidentit të zgjedhur Trump tregojnë një mungesë të plotë të kuptuarit të asaj që e bën Kanadanë një vend të fortë”, shkroi July në X.
Shefja e diplomacisë kanadeze i siguroi qytetarët e saj për qëndrueshmërinë e tyre.
”Ekonomia jonë është e fuqishme. Njerëzit tanë janë të fuqishëm. Ne kurrë nuk do të tërhiqemi përballë kërcënimeve”, tha ajo.
Që nga fitorja në zgjedhjet e muajit nëntor, Trump i është referuar Kanadasë si ”shteti i 51-të”.
Më herët, Trump kërcënoi se do të vendosë një tarifë prej 25 për qind për importet kanadeze nëse Kanadaja nuk ndërmerr hapa për të reduktuar ndjeshëm drogën dhe emigrantët e paligjshëm që kalojnë në SHBA. Në mënyrë të ngjashme, ai kërcënoi edhe Meksikën me tarifa shtesë.
Discussion about this post